یوکرین کو بحیرہ کیسپین میں جہاز پر حملے کا جواب دیا جائے گا: ایران کی دھمکی

ایران نے بحیرۂ کیسپین میں اپنے جہاز کو نشانہ بنائے جانے پر یوکرین کو سخت ترین جوابی کارروائی کا انتباہ جاری کرتے ہوئے کہا ہے کہ اس اقدام کو کسی صورت بغیر جواب کے نہیں چھوڑا جائے گا۔

ایرانی میڈیا کے مطابق ایرانی پارلیمنٹ کے ڈپٹی اسپیکر علی نیکزاد نے کہا کہ یوکرین کے اس غیر ذمہ دارانہ اقدام کا بھرپور جواب دیا جائے گا۔ انہوں نے واضح کیا کہ ایران اپنی قومی و سرحدی خودمختاری کے دفاع کا قانونی حق رکھتا ہے اور جس مقام سے بھی ایرانی مفادات پر حملہ کیا گیا، اسے جائز فوجی ہدف تصور کیا جائے گا۔

یہ شدید ردِعمل یوکرینی صدر ولودیمیر زیلنسکی کے اس دعوے کے بعد سامنے آیا ہے جس میں انہوں نے بحیرۂ کیسپین میں روسی جنگی جہاز کے ساتھ ایک ایرانی جہاز کو نشانہ بنانے کا اعلان کیا تھا، جس کی تصدیق بعد میں ایرانی وزارتِ خارجہ نے بھی کی۔ واقعے کے بعد تہران نے یوکرینی ناظم الامور کو طلب کر کے شدید احتجاج درج کرایا اور اسے اقوامِ متحدہ کے چارٹر کی خلاف ورزی اور خطے میں کشیدگی بڑھانے کا مجرمانہ اقدام قرار دیا۔