جنوبی افریقہ میں فائرنگ، دو سگے بھائیوں سمیت چار پاکستانی جاں بحق

جنوبی افریقہ میں مسلح افراد کی فائرنگ کے ایک افسوسناک واقعے میں پنجاب کے علاقے منڈی بہاؤ الدین سے تعلق رکھنے والے دو سگے بھائیوں سمیت چار پاکستانی شہری جاں بحق ہو گئے۔

ذرائع کے مطابق جاں بحق ہونے والے دو سگے بھائیوں ساجد احمد اور ظفر احمد کا تعلق ضلع منڈی بہاؤالدین کے گاؤں بلہڑ سے تھا۔ مجموعی طور پر مقتولین میں سے تین افراد کا تعلق منڈی بہاؤالدین اور ایک کا تعلق ضلع سیالکوٹ سے بتایا جا رہا ہے۔

اطلاعات کے مطابق چاروں پاکستانی دکان بند کر کے معمول کے مطابق گھر جا رہے تھے کہ راستے میں نامعلوم مسلح افراد نے ان پر اندھا دھند فائرنگ کر دی، جس کے نتیجے میں چاروں افراد موقع پر ہی دم توڑ گئے۔ واقعے کے بعد جنوبی افریقہ پولیس نے مقدمہ درج کر کے تحقیقات کا آغاز کر دیا ہے، تاہم تاحال کسی بھی ملزم کی گرفتاری عمل میں نہیں آ سکی ہے۔