فیروزوالہ میں بند ٹوٹنے سے ایک ہی گھر کے تین بچے پانی میں ڈوب کر جاں بحق

پنجاب کے ضلع شیخوپورہ کے علاقے فیروزوالہ میں نالے کا بند ٹوٹنے کے باعث ایک ہی گھر کے تین کمسن بچے پانی میں ڈوب کر جاں بحق ہو گئے۔

ریسکیو ذرائع کے مطابق افسوسناک واقعہ فیروزوالہ کی پٹھان کالونی میں پیش آیا، جہاں نالہ بھیڑ کا بند ٹوٹنے سے گھر کے قریب بڑی مقدار میں پانی جمع ہو گیا۔ حادثے کے وقت دانیال، نعمان اور برہان نامی تینوں بچے جمع شدہ پانی میں نہا رہے تھے کہ اچانک گہرے پانی کی زد میں آ کر ڈوب گئے۔

اطلاع ملتے ہی ریسکیو اہلکار فوری طور پر موقع پر پہنچے اور بچوں کو نڈھال حالت میں نکال کر ہسپتال منتقل کیا، تاہم ڈاکٹروں نے طبی معائنے کے بعد ان کی موت کی تصدیق کر دی۔ المناک حادثے کے بعد علاقے میں غم و اندوہ کی لہر ڈور گئی، جبکہ اہل علاقہ نے انتظامیہ سے نالوں اور بندوں کی بروقت مرمت اور حفاظتی اقدامات کا مطالبہ کیا ہے تاکہ ایسے واقعات کا سدِباب ہو سکے۔