الیکشن کیلئے 17 ہزار سکیورٹی اہلکار تعینات، انتخابی عمل کا آغاز آج سے ہوگا: چیف سیکرٹری آزاد کشمیر

چیف سیکرٹری آزاد جموں و کشمیر خوشحال خان نے اعلان کیا ہے کہ آئین کے مطابق آزاد کشمیر میں انتخابی عمل کا باقاعدہ آغاز ہو گیا ہے۔ مظفرآباد میں پریس کانفرنس کرتے ہوئے انہوں نے بتایا کہ الیکشن کے لیے تمام تر انتظامات مکمل کر لیے گئے ہیں اور پولنگ میٹریل تمام ریٹرننگ افسران تک پہنچا دیا گیا ہے۔

چیف سیکرٹری کا کہنا تھا کہ آزاد کشمیر میں انتخابی ماحول اپنے عروج پر ہے جہاں تمام سیاسی جماعتوں کی مرکزی قیادت مہم میں مصروف ہے۔ انتخابات کے پرامن انعقاد کے لیے 17 ہزار سیکیورٹی اہلکار تعینات کیے گئے ہیں، جن میں آزاد کشمیر پولیس کے ساتھ ساتھ پاکستان کے چاروں صوبوں کی پولیس بھی شامل ہے تاکہ ووٹرز کو فول پروف سیکیورٹی فراہم کی جا سکے۔

خوشحال خان نے مزید کہا کہ آزاد کشمیر کی تاریخ میں عوام نے ہمیشہ پرامن ماحول میں اپنا حقِ رائے دہی استعمال کیا ہے اور یہاں ووٹر ٹرن آؤٹ بھی ماضی میں بہترین رہا ہے۔ انہوں نے امید ظاہر کی کہ عوام اس بار بھی بھرپور جوش و جذبے کے ساتھ ووٹ ڈال کر اپنے نمائندوں کا انتخاب کریں گے۔