آزاد کشمیر انتخابات میں مسلم لیگ (ن) بھاری اکثریت سے کامیاب ہو گی: احسن اقبال

وفاقی وزیر برائے منصوبہ بندی و ترقی احسن اقبال نے کہا ہے کہ آزاد کشمیر کے عوام ترقی، خوشحالی اور استحکام کے لیے مسلم لیگ (ن) پر اپنے اعتماد کا اظہار کریں گے اور پارٹی آئندہ انتخابات میں بھاری اکثریت سے کامیابی حاصل کرے گی۔

نارووال میں میڈیا سے گفتگو کرتے ہوئے احسن اقبال کا کہنا تھا کہ مسلم لیگ (ن) کے پاس ملک کو ترقی دینے کی صلاحیت، تجربہ اور بہترین کارکردگی کا ٹریک ریکارڈ موجود ہے۔ انہوں نے کہا کہ آزاد کشمیر میں مسلم لیگ (ن) کے گزشتہ دورِ حکومت کو وہاں کی تاریخ کے بہترین ترقیاتی دور کے طور پر یاد رکھا جاتا ہے، اور جب بھی پارٹی نے اقتدار سنبھالا ملک بھر میں عوامی فلاح کے منصوبوں کا جال بچھایا۔

وفاقی وزیر نے پنجاب حکومت کی مثال دیتے ہوئے کہا کہ لاہور اور پنجاب کا ترقیاتی ماڈل پورے ملک کے لیے ایک مثال بن چکا ہے، جس کی خواہش کراچی اور پشاور سمیت ہر صوبے کے عوام کرتے ہیں۔ انہوں نے امید ظاہر کی کہ آزاد کشمیر کے باشعور عوام بھی واضح فرق کو مدنظر رکھتے ہوئے مسلم لیگ (ن) کو ووٹ دیں گے تاکہ خطے میں ترقی اور استحکام کا سفر جاری رہ سکے۔