’گردہ دو یا 30 لاکھ‘: بہو سے جہیز کی غیر معمولی مانگ

بھارتی ریاست اتر پردیش کے شہر کانپور میں جہیز کا ایک دل دہلا دینے والا واقعہ سامنے آیا ہے، جہاں سسرال والوں نے انسانیت کی تمام حدیں پار کرتے ہوئے بہو سے مطالبہ کیا ہے کہ وہ یا تو اپنے شوہر کو ایک گردہ عطیہ کرے یا پھر 30 لاکھ روپے نقد فراہم کرے۔ متاثرہ خاتون نے پولیس کو دی گئی درخواست میں الزام عائد کیا ہے کہ اس کی شادی لکھنؤ کے رہائشی نشانت کمار سے جون 2025 میں ہوئی تھی، تاہم شادی سے قبل شوہر کی دونوں گردوں کے فیل ہونے کی سنگین بیماری کو دھوکے سے چھپایا گیا۔

خاتون کے مطابق شادی کے وقت اس کے والدین نے 8 لاکھ روپے نقد، گاڑی اور زیورات جہیز میں دیے تھے، لیکن سسرال میں اس پر تشدد اور بدسلوکی کا سلسلہ جاری رہا۔ متاثرہ خاتون نے انکشاف کیا کہ شوہر کی بیماری کا علم ہونے پر جب اس نے سوال کیا تو سسرال والوں نے اسے گردہ دینے پر مجبور کرنا شروع کر دیا، جبکہ انکار کی صورت میں مزید 30 لاکھ روپے کا مطالبہ کیا گیا۔ خاتون نے یہ سنگین الزام بھی لگایا کہ اس کے شوہر کے کسی دوسری عورت کے ساتھ تعلقات بھی تھے جس کی اس کے گھر والے پشت پناہی کر رہے تھے۔ پولیس نے معاملے کی سنگینی کو دیکھتے ہوئے تحقیقات کا آغاز کر دیا ہے۔