غیر موجودگی میں فیصلہ سنایا گیا، فیصلہ پہلے سے لکھا ہوا تھا، سلمان صفدر

بانی پی ٹی آئی کے وکیل سلمان صفدر نے توشہ کیس کے فیصلے پر شدید ردعمل دیتے ہوئے کہا ہے کہ رات آٹھ بجے تمام وکلاء کو اچانک اطلاع دی گئی کہ توشہ کیس کی سماعت ہوگی۔ ان کے مطابق 16 اکتوبر کو کیس کو ایڈجرن کیا گیا تھا اور آج عدالتی کارروائی ہونی تھی، نہ کہ فیصلہ سنایا جانا تھا۔

سلمان صفدر کا کہنا تھا کہ ملزمان اور وکلاء کی غیر موجودگی میں فیصلہ سنایا گیا اور جج صاحب لکھا ہوا فیصلہ لے کر عدالت میں آئے۔ انہوں نے کہا کہ آج دلائل مکمل ہونے تھے، مگر اس کے برعکس دونوں ملزمان کو سترہ، سترہ سال قید اور ایک کروڑ 64 لاکھ روپے جرمانے کی سزا سنائی گئی۔

انہوں نے کہا کہ اڈیالہ جیل میں کبھی انصاف نہیں ہوا اور القادر کیس کو فکس کرنے کیلئے متعدد بار کوششیں کی گئیں، جس میں جنوری میں سزا سنائی گئی۔ سلمان صفدر کے مطابق ایک سال گزرنے کے باوجود اسلام آباد ہائیکورٹ میں ان کے کیسز نہیں سنے جا رہے۔

سلمان صفدر نے بتایا کہ سزا سننے کے بعد بھی بانی پی ٹی آئی مسکراتے رہے اور انہوں نے اپنے اور اپنی اہلیہ کی جانب سے اسلام آباد ہائیکورٹ میں اپیل دائر کرنے کی ہدایت کی ہے۔ ان کا کہنا تھا کہ بانی پی ٹی آئی اور ان کی اہلیہ کو انتہائی مشکل حالات میں رکھا گیا ہے، تاہم بانی پی ٹی آئی کا عزم اور حوصلہ بلند ہے۔

انہوں نے مزید کہا کہ 69 صفحات اور 35 پیراگراف پر مشتمل فیصلہ پہلے سے ہی لکھا ہوا تھا، جو جج صاحب نے آج سنایا۔