محسن نقوی کی قطری ہم منصب سے ملاقات، سکیورٹی تعاون بڑھانے پر اتفاق

وفاقی وزیر داخلہ محسن نقوی نے قطر کے وزیر داخلہ و کمانڈر داخلی سلامتی فورس (لخویا) شیخ خلیفہ بن حمد بن خلیفہ الثانی سے اہم ملاقات کی، جس میں سیکیورٹی اور داخلی سلامتی کے شعبوں میں دوطرفہ تعاون و شراکت داری کو مزید مضبوط بنانے پر تفصیلی تبادلۂ خیال کیا گیا۔ ملاقات کے دوران خطے کی موجودہ صورتحال، امن و استحکام اور دونوں ممالک کی وزارتِ داخلہ کے درمیان اشتراکِ عمل کو مستحکم کرنے کے عزم کا اعادہ کیا گیا۔ وفاقی وزیر داخلہ محسن نقوی نے قطری ہم منصب سے ان کے والد اور سابق امیرِ قطر شیخ حمد بن خلیفہ الثانی کے انتقال پر گہرے دکھ اور تعزیت کا اظہار کرتے ہوئے قطر کی تعمیر و ترقی میں ان کی گراں قدر خدمات کو خراجِ عقیدت پیش کیا۔ قطری وزیر داخلہ نے پاکستان کے ساتھ تعلقات کی اہمیت کو اجاگر کرتے ہوئے باہمی تعاون کو مزید فروغ دینے کا اعادہ کیا۔