دنیا کے بڑے کنٹینر بردار جہازوں میں شامل ایم ایس سی مرجام کراچی پورٹ پہنچ گیا

دنیا کے بڑے کنٹینر بردار بحری جہازوں میں شامل ‘ایم ایس سی مرجام’ (MSC Mirjam) کامیابی سے کراچی پورٹ پہنچ گیا ہے۔ کراچی پورٹ ٹرسٹ (KPT) کے مطابق 400 میٹر طویل اور 19,500 ٹی ای یوز (TEUs) کی گنجائش رکھنے والے اس دیوہیکل جہاز کو ساؤتھ ایشیا پاکستان ٹرمینل 2 (SAPT-2) پر برتھ کر دیا گیا ہے۔ پورٹ پر جہاز سے 1,500 کنٹینرز کی لوڈنگ اور آف لوڈنگ کی جائے گی، جس کے بعد یہ جہاز اپنی اگلی منزل صلالہ (سلطنتِ عمان) کے لیے روانہ ہوگا۔ کراچی پورٹ ٹرسٹ کے حکام کا کہنا ہے کہ اتنے بڑے بردار جہاز کی کامیاب ہینڈلنگ اس بات کا واضح ثبوت ہے کہ کراچی پورٹ عالمی معیار کی جدید سہولیات سے آراستہ ہے اور بڑے بحری جہازوں کی برتھنگ اور کارگو آپریشنز کی مکمل صلاحیت رکھتا ہے۔