صدر آصف زرداری کی 71 ویں سالگرہ پر گورنر ہاؤس لاہور میں تقریب

صدرِ مملکت آصف علی زرداری کی 71ویں سالگرہ کے موقع پر گورنر ہاؤس لاہور میں پُروقار تقریب کا انعقاد کیا گیا، جہاں گورنر پنجاب سردار سلیم حیدر خان نے پارٹی کارکنوں کے ہمراہ سالگرہ کا کیک کاٹا اور صدرِ مملکت کی صحت و درازیِ عمر کے لیے خصوصی دعا کی۔ تقریب سے خطاب کرتے ہوئے گورنر پنجاب نے کہا کہ صدر آصف علی زرداری کی مفاہمتی سیاست اور تدبر کی بدولت ملک میں جمہوریت کا تسلسل قائم و دائم ہے۔ انہوں نے مزید کہا کہ پاکستان پیپلز پارٹی نے ہمیشہ آئین و قانون کی بالادستی اور اداروں کی مضبوطی کے لیے قربانیاں دی ہیں، جبکہ پارٹی چیئرمین بلاول بھٹو زرداری اصولوں پر ڈٹ کر کھڑے ہونے والے جرات مند رہنما ہیں۔