نورین نیازی کے خلاف پیکا اور تعزیراتِ پاکستان کے تحت مقدمہ درج

بانی پاکستان تحریک انصاف (پی ٹی آئی) کی بہن نورین نیازی کے خلاف این سی سی آئی اے (NCCIA) اسلام آباد میں پیکا 2016 اور تعزیراتِ پاکستان کی سنگین دفعات کے تحت مقدمہ درج کر لیا گیا ہے۔ ایف آئی آر کے مطابق نورین نیازی نے ایک پوڈکاسٹ انٹرویو کے دوران ریاست، سکیورٹی اداروں اور مسلح افواج کے خلاف مبینہ طور پر جھوٹا، اشتعال انگیز اور گمراہ کن بیانیہ پھیلانے کی کوشش کی، جس کا مقصد عوام میں اداروں کے خلاف سراسیمگی اور بداعتمادی پیدا کرنا تھا۔ حکام کے مطابق نورین نیازی کے خلاف پیکا 2016 کی دفعات 20 اور 26-A کے علاوہ تعزیراتِ پاکستان کی دفعات 505 اور 506 شامل کی گئی ہیں۔ متعدد بار نوٹسز جاری کرنے کے باوجود تفتیش میں شامل نہ ہونے اور ابتدائی شواہد کی بنیاد پر مقدمہ درج کر کے کیس میں دیگر ممکنہ کرداروں کا تعین کرنے کے لیے تفتیش کا آغاز کر دیا گیا ہے۔