آسکرز میں شریک فنکاروں نے ایران جنگ کے خلاف آواز اٹھا دی

آسکرز کی رنگا رنگ تقریب اس وقت سیاسی احتجاج کا مرکز بن گئی جب نامور ہسپانوی اداکار جاویئر بارڈم نے ریڈ کارپٹ اور اسٹیج پر ایران جنگ اور فلسطینیوں پر مظالم کے خلاف آواز اٹھائی۔ بارڈم نے احتجاجاً وہی ‘پن’ پہنی جو انہوں نے 2003 میں عراق جنگ کے خلاف پہنی تھی، اور اس موقع پر “نو ٹو وار” اور “فری فلسطین” کے نعرے بلند کیے۔ انہوں نے ڈونلڈ ٹرمپ اور نیتن یاہو پر کڑی تنقید کرتے ہوئے کہا کہ 23 برس قبل کی طرح آج بھی ایک اور غیر قانونی جنگ جھوٹ کی بنیاد پر شروع کی گئی ہے۔

اداکار نے مزید کہا کہ انہوں نے فلسطین کی پن مزاحمت کی علامت کے طور پر لگائی ہے تاکہ عالمی برادری تک امن کا پیغام پہنچایا جا سکے۔ ان کا کہنا تھا کہ دنیا مزید جنگوں کی متحمل نہیں ہو سکتی اور فلسطین کو فی الفور آزاد کیا جانا چاہیے۔ تقریب میں موجود دیگر فنکاروں نے بھی بارڈم کے اس اقدام کی حمایت کی، جس سے ایوارڈ شو کی گہما گہمی میں جنگ مخالف بیانیہ نمایاں رہا۔