ایران تجارت نہیں کرسکتا تو کوئی بھی تجارت نہیں کرے گا،ایرانی آرمی چیف

ایرانی مسلح افواج کے سربراہ (آرمی چیف) میجر جنرل امیر حاتمی نے امریکہ اور عالمی طاقتوں کو سخت وارننگ دیتے ہوئے کہا ہے کہ اگر ایران بین الاقوامی منڈی میں تجارت نہیں کر سکتا تو پھر کوئی بھی دوسرا ملک اس خطے سے تجارت نہیں کر سکے گا۔ اپنے ایک اہم بیان میں ایرانی آرمی چیف نے واضح کیا کہ اگر ایران کو جینے کا بنیادی حق نہیں دیا جاتا تو پھر کوئی بھی سکون سے نہیں رہ سکے گا۔ انہوں نے زور دے کر کہا کہ آبنائے ہرمز ایران کی عزت اور قومی وقار کی علامت ہے اور ایرانی فورسز دشمنوں کو اس انتہائی اہم اور حساس تجارتی بحری گزرگاہ سے کسی بھی صورت فائدہ اٹھانے نہیں دیں گی۔

دوسری جانب، ایرانی فوج کے ترجمان بریگیڈیئر جنرل محمد اکرمینیا نے کہا ہے کہ امریکہ اس وقت مشرقِ وسطیٰ کے خطے میں انتہائی مشکل اور ابتر سیکیورٹی صورتحال سے دوچار ہے، اور اسی دباؤ کے باعث ممکن ہے کہ واشنگٹن انتظامیہ عسکری جارحیت کا سہارا لینے کی کوشش کرے۔ انہوں نے متنبہ کیا کہ تمام تر چیلنجز کے باوجود ایرانی مسلح افواج دشمن کے کسی بھی طاقتور حملے یا ممکنہ پیش قدمی کا منہ توڑ مقابلہ کرنے کے لیے مکمل طور پر تیار اور فعال ہیں۔