خیبرپختونخوا میں گورنر راج کے آپشن پر بیک ڈور کام چل رہا ہے،طارق فضل چوہدری

وفاقی وزیر برائے پارلیمانی امور طارق فضل چوہدری نے انکشاف کیا ہے کہ خیبر پختونخوا میں آئینی آپشن کے تحت گورنر راج نافذ کرنے سے متعلق پسِ پردہ (بیک ڈور) کام جاری ہے۔ ایک نجی ٹی وی چینل کے پروگرام میں گفتگو کرتے ہوئے لیگی رہنما طارق فضل چوہدری کا کہنا تھا کہ آئینِ پاکستان میں گورنر راج کا طریقہ کار اور آپشن واضح طور پر موجود ہے جسے ضرورت پڑنے پر استعمال کیا جا سکتا ہے۔ انہوں نے دعویٰ کیا کہ صوبے کے عوام خیبر پختونخوا حکومت اور بالخصوص وزیراعلیٰ سہیل آفریدی کی انتظامی کارکردگی سے بالکل مطمئن نہیں ہیں، اور امن و امان کی خراب صورتحال کے باوجود وزیراعلیٰ نے شہدا کے جنازوں تک میں شرکت نہیں کی۔

وفاقی وزیر نے مزید کہا کہ اگر صوبے میں گورنر راج لاگو ہوتا ہے تو موجودہ گورنر فیصل کریم کنڈی ہی عہدے پر برقرار رہیں گے کیونکہ وہ ایک بہترین سیاستدان اور اچھے ایڈمنسٹریٹر ہیں۔ انہوں نے پولیس ایکٹ میں ترمیم پر تنقید کرتے ہوئے کہا کہ صوبائی حکومت نے وفاق کے اختیارات کو یرغمال بنانے اور سیاسی مقاصد کے حصول کے لیے ایکٹ میں تبدیلیاں کیں۔ پی ٹی آئی کی جانب سے احتجاج اور لانگ مارچ کی کالز پر بات کرتے ہوئے ان کا کہنا تھا کہ وفاق کی تیاریاں مکمل ہیں اور پی ٹی آئی کا متوقع لانگ مارچ 4 اکتوبر کو بھی کامیاب نہیں ہو سکے گا۔