آبنائے ہرمز میں امریکی زیرِ آب ڈرون پکڑنے کا ایرانی دعویٰ، واشنگٹن نے مسترد کردیا

آبنائے ہرمز اور خلیجی خطے میں ایران اور امریکہ کے درمیان کشیدگی میں مزید اضافہ ہو گیا ہے، جہاں ایرانی پاسدارانِ انقلاب (سپاہ پاسداران) نے ایک جدید امریکی زیرِ آب ڈرون کو قبضے میں لینے کا دعویٰ کیا ہے، جبکہ امریکی فوج نے اس دعوے کو من گھڑت قرار دیتے ہوئے مسترد کر دیا ہے۔ ایرانی پاسدارانِ انقلاب کی بحری فورس کے مطابق، انہوں نے ایک حساس انٹیلی جنس آپریشن کے دوران امریکی بحریہ کی جدید بغیر پائلٹ زیرِ آب گاڑی (Underwater Drone) ‘یو ایس ریموس 600’ (US REMUS 600) کو اپنے قبضے میں لیا ہے۔ ایرانی حکام کا کہنا ہے کہ ایرانی ماہرین ڈرون میں موجود خفیہ ڈیٹا اور آلات کا تفصیلی جائزہ لے رہے ہیں۔

دوسری جانب امریکی سینٹرل کمانڈ (سینٹ کام) نے ایرانی پاسدارانِ انقلاب کے اس دعوے کی شدید الفاظ میں تردید کی ہے۔ سینٹ کام کے ترجمان کیپٹن ٹم ہاکنز نے واضح کیا کہ امریکی فوج اپنے تمام آپریشنل اور ڈرون اثاثوں پر مکمل کنٹرول رکھتی ہے اور کسی بھی قسم کا ڈرون غائب یا قبضے میں نہیں گیا۔ انہوں نے ایرانی دعوے کو تہران کی بوکھلاہٹ پر مبنی پراپیگنڈا قرار دیا۔ آبنائے ہرمز میں پیش آنے والے اس مبینہ واقعے پر واشنگٹن اور تہران کے متضاد موقف کے بعد علاقائی تناؤ میں مزید شدت آ گئی ہے، تاہم واقعے سے متعلق اب تک کوئی آزادانہ تصدیق سامنے نہیں آ سکی ہے۔