جو گھر پہلے ہی ٹوٹ گیا ہو اسے کوئی نہیں توڑ سکتا، گووندا کی گرل فرینڈ کا انکی اہلیہ کے بیان پر ردعمل

بالی ووڈ کے نامور اداکار گووندا اور ان کی اہلیہ سنیتا آہوجا کے درمیان جاری خاندانی تنازع نے ایک نیا موڑ اختیار کر لیا ہے، جہاں اداکار کی مبینہ دوست اور اداکارہ کومل رانی سوارنکر نے سنیتا آہوجا کے الزامات کو سخت الفاظ میں مسترد کر دیا ہے۔ سنیتا آہوجا کی جانب سے اپنی شادی شدہ زندگی میں مسائل کا ذمہ دار ٹھہرائے جانے کے بعد، کومل رانی نے سوشل میڈیا پلیٹ فارم انسٹاگرام پر ایک تفصیلی اسٹوری شیئر کرتے ہوئے ذاتی معاملات کو عوامی سطح پر لانے کی شدید مذمت کی۔ کومل نے مؤقف اپنایا کہ “جو گھر پہلے ہی اندر سے بکھر چکا ہو، اسے کوئی دوسرا شخص نہیں توڑ سکتا۔”

کومل رانی نے سنیتا آہوجا پر نام لیے بغیر الزام عائد کیا کہ کسی مرد کو طویل عرصے تک شدید ذہنی دباؤ میں رکھنا، اسے کام سے روکنا اور اپنوں سے دور کرنا کہاں کی وفاداری ہے۔ انہوں نے کہا کہ گھریلو ناچاکی اور نجی اختلافات کو میڈیا کے سامنے لانا محض عوام سے ہمدردی حاصل کرنے کا سستا طریقہ ہے۔ کومل نے سنیتا سے مطالبہ کیا کہ وہ ان کا نام اپنے خاندانی تنازعات میں گھسیٹنا بند کریں۔ اس سے قبل، سنیتا آہوجا نے کولکاتا کے مندر کے دورے کے موقع پر میڈیا کے سامنے روتے ہوئے کہا تھا کہ ان کا ہنستا بستا گھر بغیر کسی وجہ کے تباہ ہو رہا ہے، جس پر اداکار گووندا نے واضح کیا تھا کہ ان کے نجی معاملات پر چہ مگوئیاں نہیں ہونی چاہئیں کیونکہ یہ ان کا بالکل ذاتی معاملہ ہے۔