عازمینِ حج کی سہولت کے لیے پاک حج ایپ میں متعدد نئے فیچرز متعارف

:

وزارتِ مذہبی امور و بین المذاہب ہم آہنگی نے عازمینِ حج کی سہولت کو مدِنظر رکھتے ہوئے ‘پاک حج ایپ’ اور ڈیجیٹل حج پورٹل میں متعدد جدید فیچرز متعارف کرا دیے ہیں۔ ان اپ ڈیٹس کے بعد عازمین اب گھر بیٹھے ہی اپنے حج پیکیج کے دورانیے میں تبدیلی اور مکہ و مدینہ میں اپنی مرضی کی رہائش کا انتخاب کر سکتے ہیں۔ نیشل آئی ٹی بورڈ (NITB) کے تیار کردہ اس ڈیجیٹل پورٹل پر پرائیویٹ حج کی بکنگ کا عمل تیز رفتاری سے جاری ہے۔ ترجمان کے مطابق اب تک پرائیویٹ حج اسکیم کے تحت 26 ہزار درخواستیں موصول ہو چکی ہیں، جبکہ 45 ہزار نشستیں اب بھی خالی ہیں۔

نئے ڈیجیٹل فیچرز کے تحت عازمین گھر بیٹھے ‘ٹو بیڈ’ (Two-Bed)، ‘تھری بیڈ’ (Three-Bed)، ‘فیملی روم’ یا ‘شیئرنگ رہائش’ کا انتخاب کر سکتے ہیں، جبکہ ‘لانگ حج’ پیکیج کو ‘شارٹ حج’ یا ‘شارٹ’ کو ‘لانگ’ میں تبدیل کرنے کی سہولت بھی مہیا کر دی گئی ہے۔ اس کے علاوہ پورٹل پر ہارڈشپ کوٹے کے تحت محرم یا ہیلپر کی شمولیت اور ضرورت پڑنے پر درخواست کی منسوخی و رقم کی واپسی کا طریقہ کار بھی آسان بنا دیا گیا ہے۔ عازمین اب ایپ ہی سے میڈیکل فٹنس سرٹیفکیٹ ڈاؤن لوڈ کر کے ڈاکٹر سے تصدیق کے بعد دوبارہ اپ لوڈ کر سکیں گے، جبکہ سمندر پار پاکستانیوں کو اپنے قریب ترین تصدیق شدہ ڈاکٹر سے میڈیکل فارم کی تصدیق کروا کر پورٹل پر جمع کرانے کی ہدایت کی گئی ہے۔