امریکا صرف ایران کو مٹانے یا تباہ کرنے کا خواب ہی دیکھ سکتا ہے، ایرانی صدر

ایرانی صدر مسعود پزشکیان نے امریکی دھمکیوں پر سخت ردِعمل دیتے ہوئے کہا ہے کہ امریکہ صرف ایران کو مٹانے یا تباہ کرنے کا خواب ہی دیکھ سکتا ہے۔ ایرانی میڈیا کے مطابق ایک تقریب سے خطاب کرتے ہوئے انہوں نے عزم ظاہر کیا کہ ایرانی قوم اپنی بے پناہ طاقت اور پختہ ارادے کے ذریعے تمام بیرونی چیلنجز اور رکاوٹوں پر قابو پا لے گی۔ مسعود پزشکیان کا کہنا تھا کہ ایرانی عوام درپیش معاشی مشکلات اور عالمی پابندیوں سے سرخرو ہو کر نکلیں گے اور ملک میں پیداوار اور ترقی کے عمل کو تسلسل کے ساتھ جاری رکھیں گے۔

ایرانی صدر نے امریکی صدر ڈونلڈ ٹرمپ کے حالیہ بیانات پر تنقید کرتے ہوئے کہا کہ جب ٹرمپ ایرانی عوام کو نیست و نابود کرنے کی دھمکیاں دیتے ہیں تو یہ واضح ہو جاتا ہے کہ ان کے نزدیک انسانی حقوق، بین الاقوامی قوانین اور انسانی قدروں کی کوئی اہمیت نہیں۔ مسعود پزشکیان نے پڑوسی ممالک کے ساتھ تعلقات کے استحکام پر زور دیتے ہوئے کہا کہ امریکہ کی جانب سے ایران پر عائد سخت پابندیوں کے پیشِ نظر تمام پڑوسی ممالک کے ساتھ ثقافتی، سیاحتی اور تجارتی روابط کو فروغ دینا انتہائی ضروری ہو گیا ہے۔