غزہ سے انخلا پر اسرائیل میں سیاسی اختلافات، نیتن یاہو دباؤ کا شکار

غزہ میں حماس کے مرحلہ وار غیر مسلح ہونے کی پیشکش اور اسرائیلی افواج کے متوقع انخلا کے منصوبے نے اسرائیلی سیاست میں شدید دراڑیں ڈال دی ہیں۔ معاہدے کی مجوزہ شرائط کے تحت حماس کے ہتھیار ڈالنے کے بدلے اسرائیلی فوج کو مرحلہ وار انخلا کرنا ہوگا اور تمام انتظامی اختیارات ایک نئی فلسطینی انتظامیہ کو سونپے جائیں گے، تاہم وزیر اعظم بنیامین نیتن یاہو کی حکومت نے اب تک اس پر کوئی باضابطہ حتمی موقف اختیار نہیں کیا ہے۔

اسرائیل کے ایک سینئر حکومتی عہدیدار نے واضح کیا ہے کہ جب تک حماس کا مکمل اور حقیقی طور پر خاتمہ و غیر مسلح ہونا یقینی نہیں بنایا جاتا، تب تک غزہ سے کسی قسم کا انخلا ممکن نہیں۔ دوسری جانب، سیاسی تجزیہ کاروں کا کہنا ہے کہ آنے والے انتخابات کے تناظر میں نیتن یاہو کو ایک ساتھ اپنی سیاسی بقا، دائیں بازو کے سخت گیر اتحادیوں کی حمایت برقرار رکھنے اور امریکا کے ساتھ تعلقات میں توازن قائم رکھنے کا مشکل ترین چیلنج درپیش ہے۔