کے پی پولیس میں انویسٹی گیشن اور آپریشن ونگ الگ الگ کرنے کا فیصلہ

خیبر پختونخوا حکومت نے کرمنل جسٹس سسٹم میں شفافیت اور بہتری لانے کے لیے صوبائی پولیس کے انویسٹی گیشن اور آپریشن ونگ کو مکمل طور پر الگ کرنے کا فیصلہ کیا ہے۔ صوبائی وزیر قانون آفتاب عالم کا کہنا ہے کہ پولیس انویسٹی گیشن ونگ کو آپریشن ونگ سے مکمل انتظامی و مالی خودمختاری فراہم کی جائے گی تاکہ تفتیشی نظام کو جدید اور مؤثر بنایا جا سکے۔ اس مقصد کے لیے ایڈیشنل انسپکٹر جنرل (AIG) سے لے کر ضلعی سطح تک تفتیش کے لیے ایک بالکل الگ اور آزاد کمانڈ سٹرکچر اور چین قائم کی جائے گی۔

وزیر قانون نے مزید بتایا کہ حکومت پراسیکیوشن سسٹم کو مزید مضبوط، بااختیار اور جوابدہ بنانے پر کام کر رہی ہے، اور کسی بھی قسم کی ناقص کارکردگی پر ذمہ داری کا سخت تعین کیا جائے گا۔ اصلاحات کے اس عمل سے مقدمات میں ملزمان کی بریت کی شرح کو کم کرنے اور انہیں قرار واقعی سزا دلوانے میں مدد ملے گی۔ انہوں نے اعلان کیا کہ ‘پولیس ایکٹ ترمیمی بل’ کا مسودہ جلد حتمی شکل دے کر منظوری کے لیے پیش کیا جائے گا، جس سے صوبے میں جرائم کی روک تھام اور عوام کو فوری و بلا تعصب انصاف کی فراہمی ممکن ہو سکے گی۔