سوات: کبل خودکش دھماکے میں جاں بحق افراد کی تعداد 17 ہوگئی، حملے کا مقدمہ درج

سوات میں تھانہ کبل کے قریب فتنہ الخوارج کے خودکش حملے میں جاں بحق ہونے والے افراد کی تعداد 17 ہو گئی ہے، جن میں 07 پولیس اہلکار اور 10 شہری شامل ہیں، جبکہ 23 افراد شدید زخمی ہیں۔ ریسکیو حکام کے مطابق سیدو شریف ہسپتال میں زیرِ علاج پولیس کانسٹیبل مکرم خان زخموں کی تاب نہ لاتے ہوئے دم توڑ گیا۔ ابتدائی تحقیقات کے مطابق حملہ آور کا سر جائے وقوعہ سے مل گیا ہے اور ابتدائی شواہد خودکش بمبار کے افغان شہری ہونے کی جانب اشارہ کرتے ہیں۔ واقعے کا مقدمہ سی ٹی ڈی (CTD) تھانے میں قتل، اقدامِ قتل اور دہشت گردی کی دفعات کے تحت درج کر لیا گیا ہے۔ دوسری جانب پولیس ٹریننگ اسکول سوات میں 05 شہید پولیس اہلکاروں، بشمول ASI ہاشم خان، کی نمازِ جنازہ سرکاری اعزاز کے ساتھ ادا کر دی گئی، جس میں اعلیٰ پولیس حکام، پاک فوج کے افسران، صوبائی وزیر اور شہداء کے لواحقین نے شرکت کی۔