اسلام آباد کیلئے علیحدہ اسمبلی کے قیام کی سفارش، براہ راست انتخابات اور نیا انتظامی نظام تجویز

وفاقی حکومت نے اسلام آباد کے انتظامی ڈھانچے میں اصلاحات کے تحت الگ اسمبلی اور چیف ایگزیکٹو کے قیام کی سفارش پر غور شروع کر دیا ہے۔

ذرائع کے مطابق وزیراعظم شہباز شریف کو پیش کی گئی رپورٹ میں تجویز دی گئی ہے کہ اسلام آباد کے لیے ایک علیحدہ قانون ساز اسمبلی قائم کی جائے جو براہ راست منتخب ارکان پر مشتمل ہو۔

کمیٹی کی سفارشات کے مطابق مجوزہ اسمبلی 20 سے 30 ارکان پر مشتمل ہوگی جبکہ اس کا اپنا سیکریٹریٹ بھی ہوگا۔ یہ اسمبلی وفاقی دارالحکومت سے متعلق قانون سازی کی ذمہ دار ہوگی۔

تجاویز میں مزید کہا گیا ہے کہ اسلام آباد کا انتظامی ڈھانچہ مکمل طور پر الگ ہوگا اور ایک چیف ایگزیکٹو اس نظام کی سربراہی کرے گا۔ شہر کے ترقیاتی ادارے سی ڈی اے سمیت تمام انتظامی معاملات بھی اسی اسمبلی کے تحت آئیں گے۔

ذرائع کے مطابق وزیراعظم کی منظوری کے بعد اس منصوبے کو قانون سازی کے لیے پارلیمنٹ میں پیش کیا جائے گا۔