آئینی عدالت کا پیرسوہاہ مونال ریسٹورنٹ گرانے کا فیصلہ کالعدم قرار

وفاقی آئینی عدالت نے اسلام آباد کے معروف سیاحتی مقام پیرسوہاہ پر واقع مونال ریسٹورنٹ کو گرانے کا فیصلہ کالعدم قرار دے دیا ہے۔ عدالتِ عالیہ نے کیپٹل ڈیولپمنٹ اتھارٹی (CDA) اور میٹروپولیٹن کارپوریشن کی اپیلیں منظور کرتے ہوئے اس معاملے پر جاری حکمِ امتناعی بھی ختم کر دیا ہے۔ کیس کی سماعت کے دوران جسٹس حسن اظہر رضوی نے ریمارکس دیے کہ سپریم کورٹ کے سابقہ فیصلے میں کئی اہم قانونی نکات کو مدنظر نہیں رکھا گیا اور فیصلے میں وہ کچھ لکھا گیا جس کا اصل مقدمے سے تعلق ہی نہیں تھا، تاہم آئینی عدالت کوئی جذباتی فیصلہ نہیں کرے گی۔ عدالت نے واضح کیا کہ ٹرائل کورٹس اب کسی بھی سابقہ عدالتی آبزرویشن سے متاثر ہوئے بغیر ملکیت کا فیصلہ میرٹ پر کریں اور ریگولیٹری باڈیز تمام فریقین کو مکمل سماعت کا حق دے کر انتظامی معاملات کا فیصلہ کریں۔ سماعت کے دوران وکیل احسن بھون کی جانب سے تعریف کیے جانے پر جسٹس حسن اظہر رضوی نے کہا کہ عدالت میں ہماری تعریفیں نہ کریں، ہم وہی حکم دیں گے جو قانون کے مطابق بنتا ہے اور فیصلے میں کوئی ‘الف لیلیٰ کی کہانی’ نہیں لکھی جائے گی۔