خطے میں پائیدار امن صرف بیرونی مداخلت کے بغیر ہی ممکن ہے، عباس عراقچی

ایران کے وزیر خارجہ عباس عراقچی نے دوٹوک الفاظ میں واضح کیا ہے کہ مشرقِ وسطیٰ کے خطے میں پائیدار امن و استحکام کا قیام صرف اور صرف بیرونی یا غیر ملکی مداخلت کے بغیر ہی ممکن ہے۔

ایک خصوصی بیان میں ایرانی وزیر خارجہ نے بحرین میں منعقد ہونے والے امریکی سینٹرل کمانڈ (CENTCOM) کے اعلیٰ سطح کے عسکری و سکیورٹی اجلاس پر کڑی تنقید کی۔ عباس عراقچی کا کہنا تھا کہ امریکی فوجی کمانڈ خطے کے ممالک کو سکیورٹی فراہم کرنے میں ناکام رہی ہے اور وہ یہاں امن کے بجائے مزید بدامنی لائی ہے۔ انہوں نے طنز کرتے ہوئے مزید کہا کہ یہ غیر ملکی طاقتیں تو خود اپنا تحفظ کرنے کے قابل بھی نہیں ہیں۔

خیال رہے کہ امریکی سینٹرل کمانڈ کی قیادت میں بحرین میں خطے کے اعلیٰ فوجی حکام کا ایک اہم سکیورٹی اجلاس منعقد ہوا، جس میں مشرقِ وسطیٰ کی موجودہ کشیدہ صورتحال، علاقائی استحکام اور دفاعی تعاون کے فروغ پر تفصیلی تبادلہ خیال کیا گیا۔ اس عسکری اجلاس میں امریکہ اور مشرقِ وسطیٰ کے 12 ممالک کے دفاعی حکام نے شرکت کی، جہاں بحری تجارتی راستوں کے تحفظ خصوصاً آبنائے ہرمز (Strait of Hormuz) میں بلا رکاوٹ تجارتی سرگرمیاں اور جہاز رانی جاری رکھنے کے لیے مشترکہ کوششیں تیز کرنے پر اتفاق کیا گیا ہے۔