محبت کے نام پر 500 لڑکیوں کو بے وقوف بنا کر 2 کروڑ بٹورنے والا جعلی عاشق

بھارت میں سیکڑوں خواتین کو اپنی جھوٹی محبت اور جعلی شناختوں کے جال میں پھنسانے والا ایک بڑا فراڈیا آخر کار دہلی پولیس کے ہتھے چڑھ گیا ہے۔ غیر ملکی خبر رساں ایجنسی کے مطابق، ملزم آنند نے دھوکہ دہی کی تمام حدیں پار کرتے ہوئے 500 سے زائد لڑکیوں کو مالی اور جذباتی طور پر نقصان پہنچایا۔

ملزم کی کارروائیوں کا طریقہ کار نہایت منظم تھا؛ وہ ڈیٹنگ ایپس اور سوشل میڈیا پر خود کو کبھی نامور ڈاکٹر، کبھی فلم پروڈیوسر، وکیل یا کامیاب بزنس مین ظاہر کرتا تھا۔ اس کا اصل مقصد خواتین کا اعتماد جیت کر ان سے پیسے بٹورنا تھا۔ وہ پہلے جذباتی تعلق قائم کرتا اور پھر کسی فرضی ‘میڈیکل ایمرجنسی’ یا کاروباری نقصان کا بہانہ بنا کر لاکھوں روپے مانگتا۔ کچھ لڑکیوں کو اس نے ماڈلنگ اور بڑے اداروں میں داخلوں کے خواب دکھا کر بھی لوٹا۔

تحقیقات میں انکشاف ہوا ہے کہ اس شاطر ملزم نے اب تک مختلف خواتین سے تقریباً 2 کروڑ روپے بٹورے ہیں۔ اس منظم فراڈ کا بھانڈا اس وقت پھوٹا جب ایک متاثرہ لڑکی نے ہمت دکھائی اور پولیس کو اس کے خلاف شکایت درج کروائی۔ پولیس نے تکنیکی شواہد کی بنیاد پر ملزم کو گرفتار کر لیا ہے اور اب اس سے مزید تفتیش جاری ہے۔