ایک سے زیادہ شادیاں کرنے والے ملازمین کو نوکری سے برطرف کر دیا جائے گا

بھارتی ریاست آسام کی حکومت نے ایک سے زیادہ شادیاں کرنے والوں کے خلاف کریک ڈاؤن سخت کرتے ہوئے نیا قانون لانے کی تیاری شروع کر دی ہے۔ انڈین میڈیا رپورٹس کے مطابق، آسام حکومت نے اعلان کیا ہے کہ ایک سے زیادہ شادیاں کرنے والے افراد کو تمام سرکاری فلاحی اسکیموں کے فوائد سے محروم کر دیا جائے گا، جبکہ اس عمل میں ملوث سرکاری ملازمین کو نوکری سے برطرف کر دیا جائے گا۔ اس قانون کے حوالے سے آسام کی اسمبلی میں وزیر خزانہ جینتا مالاباروا کی جانب سے پیش کیے گئے مالیاتی سال 2026-27 کے بجٹ کے دوران تفصیلات بتائی گئیں، جس کی بعد میں وزیر اعلیٰ ہیمانتا بسوا شرما نے پریس کانفرنس کے دوران باقاعدہ توثیق کی۔ وزیر اعلیٰ شرما کا کہنا تھا کہ اگر کوئی بھی سرکاری ملازم ایک سے زائد شادیوں میں ملوث پایا گیا تو حکومت اسے فوری نوکری سے برخاست کر دے گی۔

انہوں نے مزید واضح کیا کہ متعدد شادیوں کے ساتھ ساتھ اگر کسی بھی شہری کا کوئی مجرمانہ ریکارڈ سامنے آیا، تو وہ بھی حکومت کی جانب سے دی جانے والی فلاحی اسکیموں کا اہل نہیں رہے گا۔