دنیا کے سب سے بدصورت ترین کتے نے عالمی مقابلہ جیت لیا

امریکا کی ریاست کیلیفورنیا میں منعقدہ 50ویں سالانہ ‘ورلڈز اَگلیئسٹ ڈاگ’ (دنیا کے بدصورت ترین کتے) کے مقابلے میں 6 سالہ پگ ‘جِنی لو’ نے 2026 کا عالمی اعزاز جیت لیا ہے۔

یہ تقریب 14 اگست کو کیلیفورنیا کے شہر سانتا روزا میں سونوما کاؤنٹی فیئر گراؤنڈز میں منعقد ہوئی، جس میں مختلف نسلوں اور منفرد جسمانی ساخت رکھنے والے کتوں نے حصہ لیا۔ مقابلے کو دیکھنے کے لیے شائقین کی بڑی تعداد موجود تھی۔ جِنی لو کی کامیابی پر اس کی مالکن مشیل گریڈی کو 5 ہزار ڈالر (تقریباً 13 لاکھ 86 ہزار پاکستانی روپے) کا نقد انعام دیا گیا۔ مقابلے میں ‘پنکی’ نامی چیہواہوا اور پومیرینین مکس نے دوسری جبکہ ‘اوٹو’ نامی چیہواہوا مکس نے تیسری پوزیشن حاصل کی، جنہیں بالترتیب 3 ہزار اور 2 ہزار ڈالر کے انعامات دیے گئے۔

جِنی لو کو چار سال قبل ایک پگ ریسکیو سنٹر کے ذریعے گود لیا گیا تھا، اور مسلسل تین ناکام کوششوں کے بعد وہ 2026 کا تاج اپنے نام کرنے میں کامیاب رہا۔ مالکن کے مطابق جِنی لو کو لو گوں سے ملنا اور تقریب میں شرکت کرنا بے حد پسند ہے۔

منتظمین اور سونوما مارین ایگریکلچرل ایسوسی ایشن کی سی ای او مینڈی کلینڈنن نے واضح کیا کہ اس مقابلے کا مقصد جانوروں کی تضحیک کرنا نہیں بلکہ گزشتہ 50 برسوں سے ان کی انفرادیت، ہمدردی اور جانوروں کو گود لینے کی ترغیب کو فروغ دینا ہے۔