بلوچستان سے جلد دہشت گردی کا جڑ سے خاتمہ ہوجائے گا: صدر زرداری

صدر مملکت آصف علی زرداری سے وزیراعلیٰ بلوچستان میر سرفراز بگٹی نے ایوانِ صدر اسلام آباد میں ملاقات کی ہے، جس میں صوبہ بلوچستان کی مجموعی سیاسی صورتحال، امن و امان، اور جاری ترقیاتی منصوبوں پر تفصیلی تبادلہ خیال کیا گیا।ملاقات کے دوران وزیراعلیٰ سرفراز بگٹی نے صدر مملکت کو بلوچستان میں عوامی فلاح و بہبود، صوبائی ترقیاتی منصوبوں اور امن و امان کی موجودہ صورتحال سے تفصیلی طور پر آگاہ کیا। صدر آصف علی زرداری نے اس بات پر زور دیا کہ رقبے کے لحاظ سے ملک کے سب سے بڑے صوبے بلوچستان میں پائیدار امن، تیز رفتار ترقی اور عوامی فلاح کے لیے وفاقی اور صوبائی حکومتوں کے درمیان مضبوط اور مؤثر روابط اور یکجہتی ناگزیر ہے۔ انہوں نے مزید کہا کہ بلوچستان خصوصی توجہ اور وافر وسائل کا حقدار ہے۔ صدر مملکت نے سخت موقف اپناتے ہوئے کہا کہ بیرونی سرپرستی میں متحرک دہشت گردوں اور ملک دشمن عناصر کی جانب سے بلوچستان کی ترقی اور خوشحالی میں رکاوٹیں ڈالنے کی تمام سازشوں کو ہر قیمت پر ناکام بنایا جائے گا۔ انہوں نے اس پختہ عزم کا اعادہ کیا کہ وہ دن دور نہیں جب بلوچستان سے دہشت گردی کا مکمل خاتمہ ہو جائے گا اور صوبے میں امن و استحکام کا دور دورہ ہوگا۔ اجلاس میں پاکستان پیپلز پارٹی (پی پی پی) ویمنز ونگ کی مرکزی صدر فریال تالپور اور سابق صوبائی وزیر میر علی حسن زہری بھی موجود تھے