کراچی میں جشنِ آزادی گدھا گاڑی ریس، کوئل نے میدان مار لیا

جشنِ آزادی کے پرمسرت موقع پر کراچی میں روایتی گدھا گاڑی ریس کا انعقاد کیا گیا، جس میں شہر بھر سے 40 گدھا گاڑیوں نے حصہ لیا۔ نیتی جیٹی پل سے شروع ہو کر کمشنر آفس پر اختتام پذیر ہونے والی اس سنسنی خیز ریس میں مجید بلوچ کا گدھا ‘کوئل’ پہلی پوزیشن حاصل کرنے میں کامیاب رہا، جبکہ پیتل بخش کے ‘چیما والا’ نے دوسری اور شاہ جہاں بلوچ کے ‘لال بادشاہ’ نے تیسری پوزیشن حاصل کی۔ تقریب کے مہمانِ خصوصی کمشنر کراچی حسن نقوی تھے، جبکہ ایڈیشنل آئی جی کراچی آزاد خان اور ڈی آئی جی ٹریفک پیر محمد شاہ نے بھی شرکت کی۔ ایڈیشنل آئی جی آزاد خان نے خطاب کرتے ہوئے روایتی کھیلوں کے تحفظ اور ان کے لیے سپانسرشپ کی اہمیت پر زور دیا۔ اختتام پر پہلی پوزیشن حاصل کرنے والے کو 50 ہزار، دوسری کو 30 ہزار اور تیسری پوزیشن کو 20 ہزار روپے نقد انعام و ٹرافی سے نوازا گیا۔