ایران کا متحدہ عرب امارات کا ٹینکر قبضے میں لینے کا دعویٰ

تہران: ایران نے آبنائے ہرمز کی شمالی گزرگاہ سے متحدہ عرب امارات (UAE) کے ایک آئل ٹینکر کو اپنے قبضے میں لینے کا دعویٰ کیا ہے۔

ایرانی خبر ایجنسی کے مطابق اماراتی ٹینکر دبئی کی مشہور بندرگاہ ‘جبل علی’ کی طرف جا رہا تھا کہ ایرانی حکام نے اسے راستے میں ہی روک کر کنٹرول سنبھال لیا۔ خبر ایجنسی نے مزید بتایا کہ قبضے میں لیے گئے اس اماراتی ٹینکر کو ایران کی ساحلی بندرگاہ ‘بندر عباس’ منتقل کیا جا رہا ہے۔

یہ پیشرفت ایک ایسے وقت میں سامنے آئی ہے جب متحدہ عرب امارات نے ایران کے ساتھ اپنے تمام تر تجارتی، کاروباری اور مالیاتی تعلقات تاحکمِ ثانی معطل کرنے کا اعلان کیا تھا۔ متحدہ عرب امارات کی وزارتِ خارجہ کی جانب سے جاری بیان میں واضح کیا گیا تھا کہ ایران کے ساتھ ہر قسم کی تجارت، کمرشل تبادلے اور معاشی لین دین کو فوری طور پر روک دیا گیا ہے، جس کے بعد دونوں ممالک کے درمیان کشیدگی میں شدید اضافہ دیکھا جا رہا ہے۔