بلاول بھٹو کی اپوزیشن رہنماؤں سے ملاقات، پارلیمانی امور، ملکی سیاست پر گفتگو

اسلام آباد: پاکستان پیپلزپارٹی کے چیئرمین بلاول بھٹو زرداری نے قومی اسمبلی کے اپوزیشن چیمبر میں قومی اسمبلی کے قائدِ حزبِ اختلاف محمود خان اچکزئی اور سینیٹ میں اپوزیشن لیڈر علامہ راجہ ناصر عباس سے اہم ملاقات کی، جس میں ملک کی مجموعی سیاسی صورتحال اور پارلیمانی امور پر تفصیلی گفتگو کی گئی۔

اس اہم سیاسی ملاقات میں پاکستان تحریکِ انصاف کے سیکریٹری جنرل سلمان اکرم راجہ، تحریکِ تحفظِ آئینِ پاکستان کے سیکریٹری جنرل اسد قیصر اور وائس چیئرمین مصطفیٰ نواز کھوکھر بھی موجود تھے۔ اس کے علاوہ قومی اسمبلی میں پی ٹی آئی کے چیف وہپ عامر ڈوگر، رکن قومی اسمبلی عادل بازئی اور تحریکِ تحفظِ آئینِ پاکستان کے ترجمان اخوندزادہ حسین بھی شریک ہوئے۔ پیپلزپارٹی کی جانب سے بلاول بھٹو زرداری کے ہمراہ سابق سپیکر راجہ پرویز اشرف، سینیٹر شیری رحمان، سید نوید قمر اور ندیم افضل چن نے شرکت کی۔

ملاقات کے دوران چیئرمین بلاول بھٹو زرداری نے پارلیمان میں اپوزیشن رہنماؤں سے درخواست کی کہ وہ پارلیمانی کمیٹیوں میں شامل ہو کر اپنا فعال اور مثبت کردار ادا کریں۔ انہوں نے اپوزیشن پر زور دیا کہ وہ آنے والے انتخابات میں شفافیت یقینی بنانے کے لیے انتخابی اصلاحات کے سلسلے میں پارلیمان کے اندر اپنی تجاویز اور کردار پیش کریں۔

جواب میں اپوزیشن رہنماؤں نے بتایا کہ وہ اس معاملے پر پی ٹی آئی کے بانی و چیئرمین سے مشاورت کے بعد حتمی فیصلہ کریں گے، تاہم دونوں جانب سے پارلیمان میں قانون سازی کے عمل کو بہتر بنانے کے لیے آپسی رابطے بڑھانے پر اتفاق کیا گیا۔ گفتگو کے دوران بلاول بھٹو زرداری نے سپریم کورٹ کے فیصلے کے نتیجے میں عمران خان کی ہسپتال منتقلی اور علاج کی فراہمی کو ایک خوش آئند پیشرفت اور اچھی جمہوری روایت قرار دیا۔