نواز شریف اور مریم نواز سے سعودی سفیر نواف بن سعید المالکی کی الوداعی ملاقات

پاکستان مسلم لیگ (ن) کے صدر اور سابق وزیرِ اعظم محمد نواز شریف اور وزیرِ اعلیٰ پنجاب مریم نواز شریف سے سعودی عرب کے سفیر نواف بن سعید المالکی نے الوداعی ملاقات کی ہے۔

سعودی سفیر کے وزیراعلیٰ آفس پہنچنے پر ان کا پرتپاک خیرمقدم کیا گیا۔ ملاقات کے دوران نواز شریف اور وزیراعلیٰ مریم نواز شریف نے پاک سعودی دوطرفہ تعلقات کے فروغ، سفارتی محاذ پر پیشرفت اور باہمی تعاون کو مضبوط بنانے کے لیے سعودی سفیر کی خدمات کو سراہا۔ اس موقع پر دونوں رہنماؤں نے حرمین شریفین کے تقدس، سعودی قيادت کے لیے نیک تمناؤں اور پاکستان کی خارجہ پالیسی میں سعودی عرب کی مرکزی اہمیت کو اجاگر کیا۔

سعودی سفیر نواف بن سعید المالکی نے پاکستان میں اپنے سفارتی قیام کو یادگار قرار دیتے ہوئے بہترین میزبانی اور محبت پر نواز شریف اور مریم نواز شریف کا شکریہ ادا کیا۔ ملاقات کے اختتام پر دونوں جانب سے دونوں برادر اسلامی ممالک کے درمیان تاریخی رشتوں اور پائیدار شراکت داری کو مزید آگے بڑھانے کے عزم کا اعادہ کیا گیا۔