ریٹیلر ایپ کا اجراء، چھوٹے دکانداروں کیلئے ٹیکس سکیم آسان بنا دی: وزیر خزانہ

اسلام آباد: وفاقی وزیرِ خزانہ محمد اورنگزیب نے چھوٹے دکانداروں اور تاجروں کے لیے نئی ‘ریٹیلر ایپ’ کا باقاعدہ اجراء کرتے ہوئے اعلان کیا ہے کہ چھوٹے دکانداروں کے لیے ٹیکس سکیم کو انتہائی آسان اور اختیاری بنایا گیا ہے، جبکہ ڈیجیٹل ٹیکنالوجی کے نفاذ سے ملکی معیشت میں شفافیت آئے گی۔

اسلام آباد میں پریس کانفرنس سے خطاب کرتے ہوئے وزیرِ خزانہ محمد اورنگزیب نے کہا کہ بجٹ اور ٹیکس سکیموں کو مؤثر بنانے کے لیے تمام سٹیک ہولڈرز کے ساتھ مشاورتی عمل جاری ہے۔ 25 سے 26 کروڑ آبادی والے ملک کے معاشی نظام کو آسان اور شفاف بنانا حکومت کی بنیادی ترجیح ہے۔ انہوں نے واضح کیا کہ نئی سکیم کے تحت چھوٹے دکانداروں اور بڑے تاجروں کے درمیان واضح تفریق رکھی گئی ہے۔ چھوٹے دکاندار اگر چاہیں تو اس نئی آسان سکیم کا حصہ بن سکتے ہیں یا معمول کے مطابق پرانے ٹیکس نظام میں رہنے کا انتخاب کر سکتے ہیں۔

وزیرِ خزانہ نے تاجروں سے اپیل کی کہ وہ اس سکیم میں شامل ہو کر سہولیات سے فائدہ اٹھائیں، تاہم انہوں نے تنبیہ بھی کی کہ جو افراد اس رضاکارانہ سکیم سے فائدہ نہیں اٹھائیں گے، ان کے خلاف قانون کے مطابق ضروری اقدامات کیے جائیں گے کیونکہ ہر کاروباری طبقے کو قومی ٹیکس دائرے میں لانا ضروری ہے۔

اس موقع پر وزیرِ مملکت برائے خزانہ بلال اظہر کیانی نے تاجر برادری کو مبارکباد دیتے ہوئے کہا کہ اس سکیم کی تیاری میں تاجروں سے مکمل مشاورت کی گئی ہے۔ انہوں نے بتایا کہ سکیم کا اعلان 5 جون کو کیا گیا تھا اور بجٹ کی منظوری کے بعد تمام تیاریوں کو حتمی شکل دے کر آج اس کا باقاعدہ عمل درآمد شروع کر دیا گیا ہے۔