سیکڑوں سیکاڈاز کی مسلسل آوازیں، 18 سالہ نوجوان عارضی سماعت سے محروم

چین کے صوبے ژے جیانگ کے شہر ننگبو میں ایک 18 سالہ نوجوان کو جنگل میں کیمپنگ کے دوران سیکڑوں سیکاڈاز (چنگاڑ/جھینگر نما کیڑے) کی مسلسل تیز اور مسلسل آوازیں سننے کے بعد عارضی طور پر سماعت کے شدید مسائل کا سامنا کرنا پڑا۔ وانگ نامی یہ نوجوان دوپہر کے وقت کیمپنگ کے دوران ان کیڑوں کی آوازوں کو محسوس تو کر رہا تھا مگر شام تک وہیں مقیم رہا۔ جنگل سے واپسی پر اسے کانوں میں سیٹیاں بجنے اور بھراؤ کا احساس ہوا، اور کیڑوں کا شور ختم ہوتے ہی اسے اندازہ ہوا کہ وہ پرندوں کی چہچہاہٹ اور اپنے فون کے نوٹیفکیشنز تک سننے سے قاصر ہے۔ سماعت مکمل ختم ہونے کے خوف سے نوجوان فوراً ‘نِنگبو یونیورسٹی نمبر 1 ایفیلیئٹڈ ہاسپٹل’ پہنچا، جہاں معائنے میں دونوں کانوں کے اندر سوجن پائی گئی۔ ڈاکٹروں نے سوجن کم کرنے کی ادویات دیں اور 14 دن تک کسی بھی قسم کے شور سے دور رہنے کی ہدایت کی، جس کے بعد اس کی سماعت مکمل بحال ہو گئی۔ہسپتال کے شعبہ ناک، کان اور گلا (ENT) کے سینئر ڈاکٹر لی جی کے مطابق عام طور پر لوگ یہ سمجھتے ہیں کہ قدرتی ماحول کی آوازیں کانوں کے لیے نقصان دہ نہیں ہوتیں، حالانکہ یہ سوچ غلط ہے۔سیکاڈاز کو دنیا میں سب سے بلند آواز پیدا کرنے والے کیڑوں میں شمار کیا جاتا ہے۔ اگرچہ ایک اکیلا کیڑا سماعت کو نقصان نہیں پہنچا سکتا، لیکن جب سیکڑوں سیکاڈاز بیک وقت کئی گھنٹوں تک شور مچاتے ہیں تو وہ کانوں کی سماعت کو شدید متاثر کر سکتے ہیں۔