جنگ کے دوران امریکا نے مذاکرات کی درخواست کی: ایرانی وزیر خارجہ

ایرانی وزیر خارجہ سید عباس عراقچی نے ایک اہم انکشاف کرتے ہوئے کہا ہے کہ حالیہ جنگ اور کشیدگی کے دوران امریکہ نے خود ایران سے مذاکرات کی باقاعدہ درخواست کی تھی، جس پر صدر مسعود پزشکیان نے امریکی تجاویز کو سنجیدگی سے لینے اور سفارتکاری کے ذریعے جنگ کو خاتمے کی جانب لے جانے کا ہدایت کی تھی۔

اپنے ایک تفصیلی بیان میں ایرانی وزیرِ خارجہ عباس عراقچی نے بتایا کہ صدر مسعود پزشکیان کی خصوصی تجویز اور ہدایات پر ہی پارلیمنٹ کے سپیکر محمد باقر قالیباف کو اہم مذاکراتی ٹیم کی قیادت کے لیے منتخب کیا گیا۔ انہوں نے واضح کیا کہ ایران نے بین الاقوامی ثالثوں کے ذریعے امریکہ کو واضح پیغام پہنچایا کہ وہ کسی عارضی وقفے کے بجائے مکمل اور مستقل جنگ بندی چاہتے ہیں۔ عباس عراقچی کے مطابق دشمن ایران کو سرنڈر کرانے، حکومت کی تبدیلی (رجیم چینج)، ملک کی تقسیم اور اندرونی بدامنی پھیلانے میں مکمل ناکام رہا اور اس کا ہر منصوبہ ناکامی سے دوچار ہوا۔

ایرانی وزیرِ خارجہ نے صدر مسعود پزشکیان کی علاقائی اور نرم سفارتکاری (Soft Diplomacy) کی تعریف کرتے ہوئے کہا کہ 40 روزہ جنگ کے دوران نہ صرف اندرونی طور پر بلکہ ہمسایہ ممالک کے ساتھ بھی سفارتی محاذ پر اہم کامیابیاں حاصل کی گئیں۔ انہوں نے بتایا کہ صدر پزشکیان نے کردی زبان میں گفتگو کر کے عراقی کردستان کے عوام کا اعتماد جیتا۔

عباس عراقچی نے مزید بتایا کہ 40 روزہ جنگ کے دوران ایران اور آذربائیجان کے تعلقات میں شدید کشیدگی پیدا ہو گئی تھی۔ تاہم، صدر مسعود پزشکیان نے آذربائیجان کے صدر الہام علییف سے ٹیلی فون پر رابطہ کیا اور گفتگو کے دوران روایتی آذری کہاوتوں کا بہترین استعمال کرتے ہوئے دونوں ممالک کے درمیان پیدا ہونے والی تلخی اور کشیدگی کو فوراً ختم کر دیا۔ انہوں نے زور دیا کہ ان مشکل حالات میں صدر کی سفارتی بصیرت نے ملک کے لیے انتہائی کلیدی کردار ادا کیا ہے۔