گورنر سندھ کا حکومت کو تحریک انصاف سے بات چیت نہ کرنے کا مشورہ

گورنر سندھ کامران ٹیسوری نے حکومت کو پاکستان تحریک انصاف (پی ٹی آئی) سے مذاکرات نہ کرنے کا مشورہ دیتے ہوئے کہا ہے کہ ایسے عناصر سے بات چیت نہیں ہونی چاہیے جو پاکستان کی ترقی میں رکاوٹ بن رہے ہیں۔

کراچی میں مزارِ قائد پر حاضری کے بعد میڈیا سے گفتگو کرتے ہوئے گورنر سندھ نے کہا کہ پی ٹی آئی کے رہنما مذاکرات کو نہیں مانتے، اڈیالہ میں بیٹھا شخص آج بھی اسلام آباد پر چڑھائی کا سوچتا ہے۔ ان کا کہنا تھا کہ ملک کو عدم استحکام کی طرف لے جانے والوں سے مذاکرات کا کوئی فائدہ نہیں۔

کامران ٹیسوری نے کہا کہ جس طرح پاکستان نے جنگ جیتی ہے اسی طرح معیشت کی جنگ بھی جیتی جائے گی، معرکۂ معیشت کے لیے حکومت مکمل طور پر تیار ہے۔ انہوں نے کہا کہ پاکستان خطے میں ایک اہم ملک بن چکا ہے اور اسلام آباد طاقت کا مرکز بنتا جا رہا ہے۔

گورنر سندھ کے مطابق فیلڈ مارشل کی دوٹوک پالیسی اور مضبوط عسکری حکمت عملی نے پاکستان کا عالمی اعتماد بحال کیا ہے۔ انہوں نے قومی ایئر لائن پی آئی اے کی نجکاری کو گیم چینجر قرار دیتے ہوئے کہا کہ دو دہائیوں بعد نجکاری کا عمل شفاف نظر آ رہا ہے۔

انہوں نے افغانستان کے معاملے پر بھی حکومت کی پالیسی کو سراہتے ہوئے کہا کہ پاکستان نے انتہا پسندی کے خلاف دوٹوک فیصلہ کیا ہے۔

اس سے قبل گورنر سندھ کامران ٹیسوری اور وزیراعلیٰ سندھ مراد علی شاہ نے مزارِ قائد پر حاضری دی، فاتحہ خوانی کی، جبکہ اس موقع پر سینئر وزیر شرجیل انعام میمن، ناصر حسین شاہ اور دیگر کابینہ ارکان بھی موجود تھے۔