فیفا ورلڈ کپ: دلچسپ مقابلے کے بعد مصر نے آسٹریلیا کو پنالٹی شوٹ آؤٹ پر شکست دے دی

فیفا ورلڈ کپ 2026 کے راؤنڈ آف 32 کے ایک انتہائی سنسنی خیز، اعصاب شکن اور ڈرامائی مقابلے میں مصر نے آسٹریلیا کو پینلٹی شوٹ آؤٹ پر شکست دے کر ٹورنامنٹ سے باہر کر دیا ہے اور اگلے مرحلے کے لیے کوالیفائی کر لیا ہے۔

امریکی ریاست ٹیکساس کے ڈلاس اسٹیڈیم میں کھیلے گئے اس ہائی وولٹیج میچ میں دونوں ٹیموں کے درمیان مقررہ وقت اور اضافی وقت تک سخت مقابلہ دیکھنے کو ملا اور کھیل 1-1 سے برابر رہا، جس کے بعد میچ کو فیصلہ کن بنانے کے لیے پینلٹی شوٹ آؤٹ کا سہارا لیا گیا جہاں مصر نے 2-4 سے میدان مار لیا۔

میچ کے آغاز سے ہی دونوں ٹیموں نے جارحانہ کھیل پیش کیا، تاہم کھیل کے 13ویں منٹ میں مصر کے مڈفیلڈر امام عاشور نے ایک شاندار گول داغ کر اپنی ٹیم کو 0-1 کی اہم برتری دلا دی۔ پہلے ہاف میں مصری ٹیم حاوی رہی، لیکن دوسرے ہاف میں آسٹریلوی کھلاڑیوں نے کم بیک کرنے کے لیے سر دھڑ کی بازی لگا دی۔ کھیل کے 55ویں منٹ میں آسٹریلیا کی یہ محنت اس وقت رنگ لائی جب مصر کے محمد ہانی کی جانب سے ایک بدقسمت ‘اون گول’ (Own Goal) ہو گیا، جس کی بدولت آسٹریلیا کو میچ میں 1-1 کی برابری مل گئی۔

مقررہ 90 منٹ اور اس کے بعد دیے گئے اضافی وقت میں بھی دونوں ٹیمیں مزید کوئی گول کرنے میں ناکام رہیں۔ پینلٹی شوٹ آؤٹ کے مرحلے میں مصر کے 4 کھلاڑیوں نے گیند کو کامیابی سے نیٹ کی راہ دکھائی، جبکہ آسٹریلیا کے 2 کھلاڑی دباؤ کے باعث پینلٹی مس کر بیٹھے۔ اس شاندار اور تاریخی جیت کے بعد مصری ٹیم اب ورلڈ کپ کے اگلے مرحلے ‘راؤنڈ آف 16’ میں داخل ہو چکی ہے۔