وفاقی حکومت نے ‘سول سرونٹس رولز 2026’ نافذ ، غیر ملکی شہریت چھپانے پر ملازمت ختم کرنے کی منظوری

اسلام آباد: وفاقی حکومت نے سول سرونٹس (سرکاری ملازمین) کی غیر ملکی اور دہری شہریت کے حوالے سے ایک انتہائی اہم اور بڑا اقدام اٹھاتے ہوئے نئے اور سخت ترین قواعد و ضوابط نافذ کر دیے ہیں۔

حکومت کی جانب سے باقاعدہ طور پر “سول سرونٹس (ڈسکلوزر اینڈ ریگولیشن آف فارن نیشنلٹی) رولز 2026” کا نوٹیفکیشن جاری کر دیا گیا ہے۔ ان نئے قوانین کا بنیادی مقصد سرکاری محکموں میں شفافیت لانا اور اعلیٰ عہدوں پر فائز افسران کی غیر ملکی وابستگیوں کو قانونی دائرہ کار میں لانا ہے۔

نئے نافذ العمل قواعد کے تحت اب کسی بھی سرکاری افسر کے لیے اپنی غیر ملکی شہریت کو مخفی رکھنا ممکن نہیں رہے گا تمام سول سرونٹس قانونی طور پر اس بات کے پابند ہوں گے کہ وہ اپنی، اپنی شریکِ حیات (بیوی/شوہر) اور اپنے زیرِ کفالت بچوں کی غیر ملکی شہریت کی تمام تر تفصیلات حکومت کو فراہم کریں۔سرکاری افسران اپنے غیر ملکی پاسپورٹ سمیت دیگر تمام غیر ملکی وابستگیوں اور دستاویزات سے متعلق مکمل اور مستند تفصیلات فراہم کرنے کے پابند ہوں گے۔ نئے رولز کے مطابق، اب کوئی بھی سول سرونٹ حکومت کی باقاعدہ اور پیشگی اجازت کے بغیر کسی بھی دوسرے ملک کی غیر ملکی شہریت حاصل نہیں کر سکے گا۔

وفاقی حکومت نے قوانین کی خلاف ورزی کرنے والے افسران کے خلاف سخت ترین تادیبی اور قانونی کارروائی کا انتباہ جاری کیا ہے:

“اگر کوئی بھی سرکاری افسر اپنی یا اپنے اہلخانہ کی غیر ملکی شہریت کو حکومت کے سامنے ظاہر نہیں کرتا، تو اس کے خلاف فوری طور پر سخت محکمانہ کارروائی عمل میں لائی جائے گی۔ نئے رولز کے تحت غیر ملکی شہریت یا پاسپورٹ کو چھپانا سنگین ’’مس کنڈکٹ‘‘ (Misconduct) تصور ہوگا، جبکہ غلط معلومات دینے یا حقائق پوشیدہ رکھنے والے افسران کو نوکری سے بھی برطرف (ملازمت ختم) کیا جا سکے گا۔”

ذرائع کے مطابق، اس نوٹیفکیشن کے اجراء کے بعد اسٹیبلشمنٹ ڈویژن کی جانب سے تمام وفاقی و صوبائی ملازمین کو اپنی شہریت کا ڈیٹا جمع کرانے کے لیے باقاعدہ ڈیڈ لائن بھی جلد جاری کیے جانے کا امکان ہے۔