ایران ہماری تقریباً تمام ضروری شرائط ماننے پر آمادہ ہو گیا ہے، امریکی صدر کا دعویٰ

امریکی صدر ڈونلڈ ٹرمپ نے ایک بڑا دعویٰ کرتے ہوئے کہا ہے کہ ایران کے ساتھ جاری سفارتی معاملات میں اہم پیش رفت ہوئی ہے اور تہران امریکا کی جانب سے عائد کردہ تقریباً تمام ضروری شرائط ماننے پر آمادہ ہو گیا ہے۔

امریکی صدر نے یہ اہم دعویٰ میڈیا سے گفتگو کے دوران کیا۔ اس موقع پر انہوں نے پاک و ہند اور مشرقِ وسطیٰ کے خطے کی مجموعی صورتحال کا احاطہ کرتے ہوئے کہا کہ امریکا کی ایران کے ساتھ انتہائی مثبت اور بہت اچھی بات چیت چل رہی ہے۔ معاملات خوش اسلوبی سے آگے بڑھ رہے ہیں اور خطے میں پائیدار امن کے قیام کے لیے ہماری سفارتی کوششیں مسلسل جاری ہیں۔

میڈیا سے گفتگو کے دوران صدر ڈونلڈ ٹرمپ نے دیگر سیاسی اور ذاتی موضوعات پر بھی کھل کر بات کی۔ انہوں نے دنیا کے امیر ترین بزنس مین ایلون مسک کا ذکر کرتے ہوئے کہا کہ “ایلون مسک کے ساتھ میرا بہت اچھا اور مضبوط تعلق ہے”۔ اس کے ساتھ ہی انہوں نے امریکی سیاست میں یہودی ووٹرز کے کردار پر تبصرہ کرتے ہوئے کہا کہ میری سمجھ سے بالکل بالا ہے کہ کوئی بھی یہودی ڈیموکریٹک پارٹی کو ووٹ کیسے دے سکتا ہے، جبکہ اسرائیل میں میری مقبولیت کا گراف 99 فیصد تک پہنچ چکا تھا۔