ڈنمارک: باغیچے کی کھدائی کے دوران وائکنگ دور کا خزانہ دریافت

کوپن ہیگن: ڈنمارک کے علاقے رِینِلڈ (Rebild) میں ایک مکان کے باغیچے کی کھدائی کے دوران وائکنگ عہد کا نایاب اور تاریخی لحاظ سے سب سے بڑا چاندی کا خزانہ دریافت ہوا ہے، جس میں تقریباً 700 قیمتی نوادرات شامل ہیں۔

یہ غیر معمولی دریافت اس وقت سامنے آئی جب گھر کا مالک ٹیرس کی تعمیر کے لیے زمین سے پتھر اور بجری ہٹا رہا تھا۔ محض آدھے گھنٹے کی کھدائی کے بعد مٹی کا ایک برتن برآمد ہوا، جس میں وائکنگ دور کی اشیاء محفوظ تھیں۔ آثارِ قدیمہ کے ماہرین کے مطابق 6.4 کلو گرام وزن کی 320 سے زائد اشیاء اپنے اصل مٹی کے برتن کے اندر صحیح سلامت حالت میں موجود تھیں جبکہ باقی نوادرات اردگرد کی مٹی سے بکھرے ہوئے ملے۔

دریافت ہونے والے خزانے میں چاندی کے نفیس کنگن، چاندی کی سلاخیں، کاٹے گئے ٹکڑے، 47 کامل سکے اور نورس دیوتا ‘تھور’ (Thor) سے منسوب ایک انتہائی چھوٹا علامتی ہتھوڑا شامل ہے۔ ماہرینِ آثارِ قدیمہ کا اندازہ ہے کہ یہ قیمتی پراپرٹی دسویں صدی عیسوی میں وائکنگ دور کے دوران بحران یا جنگ کی صورتحال کے پیشِ نظر زمین میں چھپائی گئی تھی، جو اس دور کی معاشی تاریخ اور وائکنگ ثقافت کو سمجھنے میں اہم پیش رفت ثابت ہوگی۔