حکومت کا یکساں گیس ٹیرف نافذ کرنے کا فیصلہ، آئی ایم ایف سے منظوری لی جائے گی

وزارتِ توانائی نے آئندہ مالی سال کے دوران ملک بھر میں یکم جولائی 2027 سے یکساں گیس ٹیرف نافذ کرنے کا حتمی فیصلہ کیا ہے، جس کے لیے بین الاقوامی مالیاتی فنڈ (IMF) سے باضابطہ منظوری لی جائے گی۔

اس اہم اصلاحاتی اقدام کے تحت حکومت کو موجودہ کراس سبسڈی کا نظام ختم کر کے کم آمدن والے غریب گھرانوں کو براہِ راست ہدفی مالی معاونت فراہم کرنے کے لیے تقریباً 162 ارب روپے مختص کرنا ہوں گے۔ مجوزہ اصلاحات کے تحت پاکستان میں گیس کے استعمال کے لیے رائج 12 سلیب پر مشتمل موجودہ ٹیرف نظام ختم کر دیا جائے گا، جس کے تحت صارفین ماہانہ گیس کی کھپت کے حساب سے مختلف نرخ ادا کرتے ہیں۔ اس کے بجائے، تمام صارفین کے زمروں کو بتدریج تقریباً 1,708 روپے فی ایم ایم بی ٹی یو (MMBTU) کے یکساں اوسط ٹیرف پر منتقل کیا جائے گا۔

آمدنی کی بنیاد پر ہدف شدہ سبسڈی:

ذرائع کے مطابق، کم آمدن اور مستحق افراد کو گیس کے استعمال پر یونٹس کے بجائے اب خاندانی آمدنی کی بنیاد پر سبسڈی دینے کی تجویز دی گئی ہے۔ پاکستان پہلے ہی آئی ایم ایف سے کراس سبسڈی ختم کرنے کا وعدہ کر چکا ہے، اور اب گیس پر ریلیف حاصل کرنے کے لیے گھریلو آمدنی ہی اصل معیار بنے گی۔ ان مستحق صارفین کی مالی معاونت بے نظیر انکم سپورٹ پروگرام (BISP) کے ذریعے کی جائے گی۔

موجودہ نظام میں کم گیس استعمال کرنے والے (پروٹیکڈ) صارفین انتہائی کم نرخوں یعنی 200 سے 350 روپے فی ایم ایم بی ٹی یو تک گیس حاصل کر رہے ہیں، تاہم اس کراس سبسڈی کے خاتمے کے بعد بجٹ میں 162 ارب روپے کی کثیر رقم مختص کی جائے گی۔ اس نئی پالیسی کے نفاذ سے گھریلو صارفین کے بلوں اور نرخوں میں نمایاں اضافہ متوقع ہے، جبکہ دوسری طرف صنعتی اور تجارتی شعبے کے لیے گیس کے نرخوں میں نمایاں کمی کا روشن امکان ظاہر کیا جا رہا ہے۔