حافظ نعیم سے منسوب لغو بات پھیلائی جا رہی ہے: لیاقت بلوچ

جماعتِ اسلامی کے نائب امیر لیاقت بلوچ نے ایک بیان میں دوٹوک الفاظ میں کہا ہے کہ ایک خاص اور مذموم ایجنڈے کے تحت امیرِ جماعتِ اسلامی حافظ نعیم الرحمٰن سے منسوب من گھڑت اور لغو باتیں سوشل میڈیا اور دیگر ذرائع سے پھیلائی جا رہی ہیں، جن کا حقیقت سے کوئی دور کا بھی واسطہ نہیں۔

لیاقت بلوچ نے وضاحت کرتے ہوئے کہا کہ حافظ نعیم الرحمٰن نے پیٹرولیم لیوی میں 35 سے 40 روپے کم کرنے کا کوئی مطالبہ نہیں کیا، تاہم ہمیں پوری اُمید ہے کہ وزیرِ اعظم پاکستان اپنا کیا ہوا وعدہ ضرور پورا کریں گے، اور بصورتِ دیگر جماعتِ اسلامی ملتان سے اسلام آباد کی طرف ایک بڑا ’سپر مارچ‘ کرنے پر مجبور ہوگی۔

انہوں نے کہا کہ جماعتِ اسلامی پچھلے ڈیڑھ ماہ سے زائد عرصے سے عوام کے حقوق کے لیے پُرامن دھرنے اور مارچ کا سلسلہ جاری رکھے ہوئے ہے، اور عوام پر پٹرولیم لیوی اور دیگر ظالمانہ ٹیکسز کے نام پر وصول کیے جانے والے 130 روپے سے زائد کے ’بھتے‘ کا فوری خاتمہ ہماری اولین ترجیح ہے۔

نائب امیرِ جماعتِ اسلامی کا مزید کہنا تھا کہ وزیرِ اعظم شہباز شریف کی کال اور یقین دہانی پر حافظ نعیم الرحمٰن نے پٹرول اور ٹیکسوں کے اس غیر منصفانہ بوجھ کے مکمل خاتمے کا مطالبہ کیا تھا، اور وزیرِ اعظم نے خود بیرونِ ملک دورے سے واپس آ کر عوام کے لیے ایک بڑے ریلیف پیکیج کا اعلان کرنے کی یقین دہانی کرائی تھی۔