نیتن یاہو نے اماراتی صدر کی دعوت پر ابوظہبی کا دورہ کیا: اسرائیلی وزیراعظم دفتر

اسرائیلی وزیراعظم کے دفتر اور اماراتی سرکاری خبر ایجنسی نے باضابطہ طور پر تصدیق کی ہے کہ اسرائیلی وزیرِاعظم بنجمن نیتن یاہو نے متحدہ عرب امارات کے صدر شیخ محمد بن زاید آل نہیان کی دعوت پر یو اے ای کا دورہ کیا ہے۔

اماراتی سرکاری ذرائع کے مطابق، دونوں رہنماؤں کے درمیان ہونے والی ملاقات میں دوطرفہ تعلقات کو مزید فروغ دینے اور خطے کے اہم چیلنجز پر تفصیلی تبادلۂ خیال کیا گیا۔ تین سینئر اسرائیلی حکام نے انکشاف کیا کہ یہ اہم ملاقات تقریباً چھ گھنٹے تک جاری رہی، جس میں بنیادی طور پر ایران کی صورتحال اور خطے کی سلامتی پر خصوصی توجہ مرکوز کی گئی۔

یاد رہے کہ رواں سال کے آغاز میں متحدہ عرب امارات نے اس بات کی سختی سے تردید کی تھی کہ شیخ محمد نے نیتن یاہو سے کوئی ملاقات کی ہے، جو کہ اس وقت سامنے آئی جب اسرائیلی وزیراعظم کے دفتر نے مئی میں دعویٰ کیا تھا کہ نیتن یاہو نے خفیہ طور پر خلیجی ملک کا دورہ کر کے اماراتی صدر سے ملاقات کی تھی۔ اس سے قبل باخبر ذرائع نے بتایا تھا کہ دونوں رہنماؤں کی یہ ملاقات 26 مارچ کو العین میں ہوئی تھی۔

موجودہ دورے کے حوالے سے اسرائیلی میڈیا میں یہ تہلکہ خیز رپورٹس بھی زیرِ گردش رہیں کہ نیتن یاہو کا یہ دورہ دراصل اس اسرائیلی میڈیا رپورٹ کے تناظر میں تھا جس میں دعویٰ کیا گیا تھا کہ اماراتی صدر نے 7 اکتوبر 2023 کو حماس کے حملے سے قبل نیتن یاہو کو مبینہ طور پر خبردار کیا تھا، تاہم اسرائیلی وزیراعظم نے وہ انتباہ متعلقہ سکیورٹی اداروں تک نہیں پہنچایا تھا (نیتن یاہو اس خبر کی تردید کر چکے ہیں)۔ اسرائیلی میڈیا کے مطابق، نیتن یاہو اس اتوار کو خصوصی طور پر شیخ محمد سے یہ درخواست کرنے کے لیے یو اے ای گئے تھے کہ وہ 2023 کے مبینہ انتباہ کی عوامی سطح پر تردید کریں

اس دورے کی منزل اور تفصیلات کی باضابطہ تصدیق ہونے سے پہلے ہی، اسرائیل کی داخلی سکیورٹی سروس (شن بیت) نے ایک مقامی ٹی وی چینل (چینل 12) کے خلاف سخت سنسرشپ قوانین کی مبینہ خلاف ورزی پر قانونی کارروائی کے لیے شکایت درج کرا دی۔

وزیراعظم کے دفتر، جو کہ سکیورٹی ایجنسی کی نگرانی بھی کرتا ہے، کی جانب سے جاری بیان میں کہا گیا کہ اس خفیہ دورے کی قبل از وقت خبر نشر کرنے سے وزیراعظم، ان کی اہلیہ اور وفد (جس میں موساد کے سربراہ اور دیگر اعلیٰ سکیورٹی حکام شامل تھے) کی زندگیاں شدید خطرے میں پڑ گئیں۔ بیان کے مطابق، جب دورے کی خبر میڈیا پر نشر ہوئی تو وزیراعظم کا طیارہ ابھی اسرائیلی فضائی حدود سے باہر تھا۔ انٹیلی جنس ایجنسی ’موساد‘ نے بھی اس خبر کے لیک ہونے کی سخت مذمت کی ہے۔

واضح رہے کہ ایران کے ساتھ جاری علاقائی کشیدگی اور حملوں کی زد میں آنے کے بعد سے متحدہ عرب امارات نے امریکہ اور اسرائیل کے ساتھ اپنے سکیورٹی اور دفاعی تعلقات کو مزید مستحکم کیا ہے۔ یو اے ای نے 2020 میں تاریخی ابراہیم معاہدوں کے تحت اسرائیل کے ساتھ باضابطہ سفارتی تعلقات قائم کیے تھے۔