قطر نے ہمارے مؤقف سے امریکا کو آگاہ کر دیا، اب جواب کا انتظار ہے: عراقچی

ایرانی وزیرِ خارجہ عباس عراقچی نے نیویارک سے تہران روانگی سے قبل میڈیا سے گفتگو کرتے ہوئے کہا ہے کہ قطر کے ثالثی کردار کے ذریعے ایران کا سات نکاتی منصوبہ امریکہ تک کامیابی سے پہنچا دیا گیا ہے، اور اب ایران کو واشنگٹن کے باضابطہ جواب کا انتظار ہے۔

ایرانی وزیرِ خارجہ نے وضاحت کی کہ قطری ثالثوں کے توسط سے ہونے والی سفارتی بات چیت میں ایران کا اصولی مؤقف اور شرائط امریکا تک پہنچائی جا چکی ہیں، اور یہ توقع کی جا رہی ہے کہ وائٹ ہاؤس کا جواب منگل کے روز ثالثوں کے ذریعے ایران کو موصول ہو جائے گا۔ انہوں نے کہا کہ ہمارا بنیادی مشن امریکی فریق کو ان شرائط سے آگاہ کرنا اور عالمی برادری کو یہ باور کرانا تھا کہ ایران اس معاملے پر ایک واضح اور جامع منصوبہ رکھتا ہے، جس کی شرائط مکمل طور پر منصفانہ اور منطقی ہیں۔ ان کا کہنا تھا کہ اگر امریکی رہنما واقعی کسی منصفانہ معاہدے یا پُرامن حل کے خواہاں ہیں، تو ایران نے وہ حل میز پر رکھ دیا ہے۔

جوہری پروگرام اور مؤقف میں تبدیلی کی تردید:

عباس عراقچی نے گزشتہ چند گھنٹوں کے دوران ذرائع ابلاغ میں زیرِ گردش ان تمام قیاس آرائیوں اور پروپیگنڈے کی بھی سخت ترین تردید کی جن میں یہ تاثر دیا جا رہا تھا کہ ایران اپنے جوہری پروگرام یا مؤقف میں کسی قسم کی لچک دکھانے پر آمادہ ہو گیا ہے۔ انہوں نے دوٹوک الفاظ میں کہا:

”مختلف میڈیا ذرائع سے ایران سے متعلق بے بنیاد باتیں منسوب کی جا رہی ہیں، میں واضح طور پر کہتا ہوں کہ ایران کے مؤقف میں کوئی تبدیلی نہیں آئی، اور آبنائے ہرمز کو مکمل طور پر کھولنے کے لیے ہماری شرائط انتہائی واضح ہیں۔“

واضح رہے کہ عباس عراقچی ایرانی صدر مسعود پزشکیان اور دیگر اعلیٰ سطحی سفارت کاروں کے ہمراہ اقوامِ متحدہ کی جنرل اسمبلی کے سالانہ اجلاس میں شرکت کے لیے نیویارک گئے تھے۔ دورے کے اختتام پر گفتگو کرتے ہوئے انہوں نے اس عزم کا اظہار کیا کہ اس سفارتی دورے کے مثبت نتائج نے یہ ثابت کر دیا ہے کہ اسلامی جمہوریہ ایران، امریکہ اور صہیونی حکومت کی جانب سے کی جانے والی تنہا کرنے کی تمام تر کوششوں کے برعکس، عالمی سطح پر ہرگز تنہا نہیں بلکہ اسے دنیا بھر میں بھرپور عزت و احترام حاصل ہے۔ انہوں نے مزید کہا کہ دورے کے دوران ہونے والی متعدد ملاقاتوں سے یہ بات عیاں ہوئی کہ دنیا بھر کے ممالک کے عوام اور حکام ایران کے اصولی اقدامات اور خطے میں مزاحمت کی تاریخ کو قدر کی نگاہ سے دیکھتے ہیں۔