سعودی عرب کی سلامتی پاکستان کیلئے ریڈ لائن ہے: مولانا طاہر اشرفی

پاکستان علماء کونسل کے سربراہ مولانا حافظ طاہر محمود اشرفی نے مدینہ منورہ کی اسلامی یونیورسٹی میں ”فکری گمراہی اور انتہاپسندی کے انسداد کے لیے عالمی کوششیں“ کے موضوع پر منعقدہ ایک بین الاقوامی کانفرنس سے خطاب کرتے ہوئے دوٹوک الفاظ میں کہا ہے کہ سعودی عرب کی سلامتی پاکستان کے لیے ریڈ لائن ہے، اور اس کے دفاع کے لیے پاکستانی عوام اور عسکری و سیاسی قیادت کا عزم غیر متزلزل ہے۔

کانفرنس سے خطاب کرتے ہوئے مولانا طاہر اشرفی کا کہنا تھا کہ یمنی حوثی دہشت گرد ہیں، جن کا حقیقی اسلام سے کوئی تعلق نہیں ہے، اور ان کے پس پردہ اسلام اور امتِ مسلمہ کے دشمن عناصر کارفرما ہیں۔

انہوں نے واشگاف الفاظ میں کہا کہ خادمِ حرمین شریفین اور سعودی عرب کے دفاع کی خاطر پاکستانی قوم اپنی اولاد، جان اور مال کی قربانی دینے سے بھی ایک لمحے کے لیے دریغ نہیں کرے گی، کیونکہ اس حوالے سے ہمارا اللہ تعالیٰ اور سعودی قیادت کے ساتھ اٹوٹ عہد ہے۔

پاکستان علماء کونسل کے سربراہ نے مملکتِ سعودی عرب کی سلامتی، خودمختاری اور استحکام کے ساتھ مکمل یکجہتی کا بھرپور اظہار کیا، جبکہ عالمی سطح پر فکری گمراہی، فرقہ واریت اور انتہاپسندی کے ناسور کے خاتمے کے لیے تمام مسلم ممالک اور دنیا کو مل کر مشترکہ اور مؤثر کوششیں کرنے کی ضرورت پر بھی زور دیا۔