پاکستان اور آئی ایم ایف کے درمیان 1.2 ارب ڈالر قسط کیلئے مذاکرات کا آغاز

پاکستان اور بین الاقوامی مالیاتی فنڈ (آئی ایم ایف) کے درمیان اقتصادی جائزے کے حوالے سے باضابطہ مذاکرات کا آغاز ہو گیا ہے، جس کے سلسلے میں وفاقی وزیر خزانہ محمد اورنگزیب نے آئی ایم ایف مشن کے ساتھ ورچوئل مذاکرات کے کِک آف (Kick-off) اجلاس میں شرکت کی۔

ذرائع کے مطابق، افتتاحی اجلاس میں آئی ایم ایف مشن کی سربراہی آئیوا پیٹرووا (Iva Petrova) نے کی، جبکہ اس سیشن کے دوران پاکستان اور آئی ایم ایف کے مابین توسیعی فنڈ سہولت (EFF) کے چوتھے جائزے پر تفصیلی بات چیت کی گئی۔ اس کے علاوہ اجلاس میں تخفیفِ غربت اور استحکام کی سہولت (RSF) کے تیسرے جائزے پر بھی مباحثے کا آغاز کیا گیا۔

اجلاس کے دوران ملکی معاشی ٹیم نے آئی ایم ایف کے وفد کو پاکستان کی مجموعی معاشی اور اقتصادی صورتحال پر جامع بریفنگ دی، جبکہ وزیر خزانہ نے ملک میں معاشی استحکام، ساختیاتی اصلاحات اور طے شدہ اہداف پر حکومت کی اب تک کی پیش رفت سے وفد کو آگاہ کیا۔

مذاکرات میں آئی ایم ایف پروگرام کے تحت مقررہ اہداف، مالیاتی امور، محصولات میں بہتری اور مالیاتی نظم و ضبط سے متعلق امور زیرِ بحث لائے گئے۔ ذرائع کا کہنا ہے کہ آئی ایم ایف مشن پاکستان کے معاشی اور مالیاتی حکام کے ساتھ پالیسی سطح پر یہ مذاکرات آئندہ بھی جاری رکھے گا۔