واشنگٹن چاہتا ہے خلیجی ممالک ایران بارے حکمت عملی کی حمایت کریں: امریکی تھنک ٹینک

امریکی تھنک ٹینک “کیٹو انسٹیٹیوٹ” نے اپنی حالیہ رپورٹ میں کہا ہے کہ امریکا چاہتا ہے کہ خلیجی ممالک ایران سے متعلق اس کی سفارتی اور تزویراتی حکمتِ عملی کی بھرپور حمایت کریں، کیونکہ یہ ممالک امریکی سکیورٹی اور عالمی توانائی کے مفادات کے لیے انتہائی اہمیت کے حامل ہیں۔

کیٹو انسٹیٹیوٹ کے سینئر فیلو اور سابق امریکی صدر رونالڈ ریگن کے سابق معاون خصوصی ڈاؤگ بینڈو نے اس حوالے سے گفتگو کرتے ہوئے کہا کہ خلیجی (گلف) ممالک طویل عرصے سے واشنگٹن کے اہم ترین اتحادی رہے ہیں۔ ان ممالک میں امریکا کے بڑے فوجی اڈے موجود ہیں، یہی وجہ ہے کہ ان کی سلامتی واشنگٹن کی خارجہ پالیسی میں غیر معمولی اہمیت رکھتی ہے۔ انہوں نے مزید کہا کہ خلیجی ممالک کی اہمیت اس وجہ سے بھی بہت زیادہ ہے کیونکہ وہ دنیا میں توانائی (تیل اور گیس) پیدا کرنے والے سب سے بڑے ممالک میں شمار ہوتے ہیں۔

ڈاؤگ بینڈو کے مطابق، امریکا اور ایران کے درمیان ہونے والے حالیہ مذاکرات کا سب سے اہم اور حساس موضوع “آبنائے ہرمز” ہوگا۔ اس وقت دونوں فریقین مذاکرات کی میز پر برتری حاصل کرنے کی کوشش کر رہے ہیں اور ہر ایک خطے میں اپنی طاقت اور اثر و رسوخ کو نمایاں کرنا چاہتا ہے۔ انہوں نے واضح کیا کہ تہران کا سب سے مضبوط ہتھیار آبنائے ہرمز پر اثر انداز ہونے اور عالمی بحری تجارت کو متاثر کرنے کی صلاحیت ہے۔امریکی ماہر کا مزید کہنا تھا کہ اگرچہ دونوں ممالک نے ان اہم مذاکرات کے لیے 60 روز کی مدت مقرر کی ہے، تاہم خطے کی پیچیدہ صورتحال کو مدِ نظر رکھتے ہوئے کسی حتمی اور پائیدار معاہدے تک پہنچنے میں اس مقررہ مدت سے کہیں زیادہ وقت بھی لگ سکتا ہے۔