امریکی صدر کی قطر کی جانب سے دیئے گئے ایئر فورس ون طیارے پر ٹیکساس روانگی

امریکی صدر ڈونلڈ ٹرمپ قطر کی جانب سے تحفے میں دیے گئے نئے ایئر فورس ون طیارے (بوئنگ 747) پر سوار ہو کر ٹیکساس روانہ ہو گئے، تاہم پرواز سے قبل طیارے کی ایمرجنسی ایگزٹ سلائیڈ اچانک کھل جانے کے باعث ایئرپورٹ پر کچھ دیر کے لیے غیر معمولی اور تشویشناک صورتحال پیدا ہو گئی۔ بین الاقوامی خبر رساں ادارے ’رائٹرز‘ کے مطابق صدر ٹرمپ ڈلاس میں انعقاد پذیر ریپبلکن پارٹی کے پہلے مڈ ٹرم کنونشن میں شرکت کے لیے روانہ ہو رہے تھے کہ جوائنٹ بیس اینڈریوز پر کھڑے طیارے کے ایک جانب ایمرجنسی سلائیڈ کھلی ہوئی دیکھی گئی۔

واقعے کے وقت صدر ٹرمپ سیکیورٹی خدشات کے پیش نظر تقریباً 20 منٹ تک اپنے ’میرین ون‘ ہیلی کاپٹر کے اندر ہی موجود رہے، تاہم بعد میں عملے کی جانب سے ایمرجنسی سلائیڈ ہٹائے جانے کے بعد وہ طیارے میں منتقل ہو گئے۔ صحافیوں کے سوالات کا جواب دیتے ہوئے صدر ٹرمپ نے طیارے کی حفاظت پر مکمل اطمینان کا اظہار کیا اور کہا کہ اگر انہیں اس کی سیفٹی پر پورا اعتماد نہ ہوتا تو وہ اس میں ہرگز سوار نہ ہوتے۔ واضح رہے کہ قطر سے تحفے میں ملنے والے اس بوئنگ 747 طیارے کو جدید ترین ٹیکنالوجی اور سیکیورٹی سے آراستہ کرنے اور تیز ترین تزئین و آرائش کے بعد صدر ٹرمپ نے یکم جولائی سے اپنے سرکاری اسفار کے لیے استعمال کرنا شروع کیا تھا۔