ٹی وی چینلز سے اشتہاراتی آمدن پر 5 فیصد محصول کے پیمرا نوٹسز کے خلاف کیس، فیصلہ محفوظ

اسلام آباد ہائی کورٹ نے ٹی وی چینلز کو اشتہارات کی مد میں سالانہ آمدنی کا پانچ فیصد بطور محصول جمع کرانے کے پیمرا نوٹسز کے خلاف دائر درخواستوں پر فیصلہ محفوظ کر لیا ہے۔ یہ سماعت جسٹس ثمن رفعت امتیاز نے پاکستان براڈ کاسٹرز ایسوسی ایشن (پی بی اے) سمیت آٹھ ٹی وی چینلز کی درخواستوں پر کی۔

سماعت کے دوران پی بی اے اور ٹی وی چینلز کی جانب سے فیصل صدیقی ایڈووکیٹ عدالت میں پیش ہوئے۔ وکیل پی بی اے نے مؤقف اختیار کیا کہ پیمرا نے 13 سال کے عرصے کی تقریباً دو ارب روپے کے قریب رقم جمع کرانے کے نوٹس جاری کیے ہیں، حالانکہ ٹی وی چینلز کو برسوں قبل لائسنس دیے گئے تھے اور اس سے پہلے کبھی اشتہاراتی آمدن سے پانچ فیصد ادائیگی کا تقاضا نہیں کیا گیا۔

عدالت کو بتایا گیا کہ پیمرا اشتہارات کی آمدنی پر پانچ فیصد سالانہ محصول کا مطالبہ پیمرا رولز 2009 کے شیڈول بی کی بنیاد پر کر رہا ہے، جبکہ پیمرا کے پاس ٹیکس عائد کرنے کا کوئی قانونی اختیار نہیں۔ وکیل کے مطابق پیمرا پہلے ہی ٹی وی چینلز سے سالانہ لائسنس فیس وصول کرتا ہے۔

دوسری جانب پیمرا کے وکیل نے دلائل دیتے ہوئے کہا کہ ٹی وی چینلز نے آج تک اشتہارات کی سالانہ آمدن کا پانچ فیصد پیمرا کو ادا نہیں کیا، اور ڈیمانڈ نوٹس کے مطابق اربوں روپے کی رقم بنتی ہے۔

اس موقع پر فیصل صدیقی ایڈووکیٹ نے مؤقف اختیار کیا کہ کوئی بھی چینل اتنی بڑی رقم ادا کرنے کی استطاعت نہیں رکھتا، اور اگر ایسا کیا گیا تو چینلز کا چلنا ممکن نہیں رہے گا۔

عدالت نے فریقین کے دلائل سننے کے بعد پی بی اے اور ٹی وی چینلز کی درخواستوں پر فیصلہ محفوظ کر لیا۔ واضح رہے کہ پی بی اے اور ٹی وی چینلز نے پیمرا کے ان نوٹسز کے خلاف 2022 میں اسلام آباد ہائی کورٹ سے رجوع کیا تھا، جس پر عدالت پہلے ہی اشتہارات کی سالانہ آمدن پر پانچ فیصد محصول کی ادائیگی کے نوٹسز پر حکمِ امتناع جاری کر چکی ہے۔