انسدادِ دہشت گردی عدالت اسلام آباد کا 230 سے زائد ضمانتوں میں توسیع کا حکم، 29 اکتوبر تک پولیس کو   پی ٹی آئی رہنماؤں کی گرفتاری سے روک دیا

انسدادِ دہشت گردی عدالت (ATC) اسلام آباد نے پاکستان تحریکِ انصاف (پی ٹی آئی) کے رہنماؤں کے خلاف 26 نومبر کے احتجاج، سنگجانی جلسے اور سپریم کورٹ کے باہر مظاہروں سمیت مختلف مقدمات کی سماعت کرتے ہوئے ملزمان کی 230 سے زائد عبوری ضمانتوں میں توسیع کر دی ہے۔

کیس کی سماعت انسدادِ دہشت گردی عدالت کے جج ابوالحسنات محمد ذوالقرنین نے کی۔ سماعت کے دوران پی ٹی آئی رہنما جنید اکبر، رؤف حسن، سابق وزیراعظم آزاد کشمیر عبدالقیوم نیازی سمیت دیگر متعلقہ رہنما اور وکلاء عدالت کے سامنے پیش ہوئے۔

عدالت نے پولیس کو ہدایت کی کہ 29 اکتوبر تک پی ٹی آئی رہنماؤں کو ان مقدمات میں گرفتار نہ کیا جائے۔ مزید برآں، جج ابوالحسنات محمد ذوالقرنین نے آئندہ سماعت پر تمام فریقین کو حتمی دلائل پیش کرنے کی ہدایت کرتے ہوئے کیس کی سماعت 29 اکتوبر تک ملتوی کر دی۔

واضح رہے کہ پی ٹی آئی رہنماؤں کے خلاف انسدادِ دہشت گردی کی دفعات کے تحت اسلام آباد کے مختلف تھانوں جن میں ترنول، رمنا، آبپارہ، سیکرٹریٹ اور دیگر شامل ہیں، میں متعدد مقدمات درج ہیں۔